Qazaqstanda ónerkásiptegi eń joǵary aılyq 1,2 mln teńge boldy
NUR-SULTAN. QazAqparat - Qazaqstanda taý-ken salasynyń jumysshylary aıyna shamamen 400 myń teńge jalaqy alady, dep habarlaıdy QazAqparat tilshisi energyprom-ǵa silteme jasap.
«2019 jyldyń alǵashqy toqsanynda ónerkásip salasyndaǵy jumysshylardyń ortasha nomınaldy aılyǵy 243,8 myń teńge bolyp, bir jylda 9,2 paıyzǵa ósken. Sektordaǵy aılyq eńbekaqy boıynsha satyp alý múmkindiginiń ınflıatsııasyn esepke alsaq ósim 4 paıyzdy kórsetken. Eń joǵarǵy aılyq - taý-ken salasyndaǵy ónerkásip jumysshylarynda. Bul segmenttiń qyzmetkerleri aıyna ortasha eseppen 401,1 myń teńge (jyldyq +9,5 paıyzdyq ósimmen) tabady», - delingen zertteý málimetinde.
Óńdeý ónerkásibi salasyndaǵy ortasha statıstıkalyq jumysshynyń aılyǵy birshama tómen - 189,2 myń teńge. Elektrmen qamtý salasyndaǵy jumysshylar aıyna 157,4 myń teńgege jýyq alsa, sýmen qamtý sektorynyń jumysshylarynyń aılyǵy 118,1 myń teńge kóleminde.
Taý-ken salasyndaǵy aıtarlyqtaı joǵary eńbekaqyny munaı men tabıǵı gaz salasynda jumys isteıtin qyzmetkerler alady. Olardyń aılyǵy shamamen 785,2 myń teńge. Bul respýblıkadaǵy ortasha aılyqtan (168,5 myń teńge) 4,7 esege kóp.
Ekinshi orynda taý-ken ónerkásibi salasyndaǵy tehnıkalyq qyzmet kórsetýshi personal tur. Olar shamamen aıyna 421,9 myń teńge alady. Aılyq jaǵynan aldyńǵy oryndaǵy mamandyq ıeleriniń úshtigin 281 myń teńgemen kómir men lıgnıt óndirý salasynyń jumysshylary túıindedi.
Eń úlken aılyq - Batys Qazaqstan oblysynyń taý-ken salasyndaǵy mamandarynda. Birinshi toqsan boıynsha ondaǵy keı mamandar aıyna 1,2 mıllıon teńge aılyq alǵan. Bul kórsetkish - eldegi jumysshylardyń ortasha aılyǵynan 7,1 esege artyq.
Ekinshi oryn Nur-Sultan qalasynda: elordada jumysta júrgen taý-ken salasynyń qyzmetkerleri shamamen aıyna 1,1 mln teńge (jyldyq ósimi 8,1 paıyzy) alady. Úshtikke sondaı-aq Atyraý oblysy enip otyr. Ol óńirde sektordaǵy jumysshylar 920, 2 myń teńge alyp, bir jylda 14,3 paıyzdyq ósimdi kórsetken.
