Qazaqstanda ónerkásip óndirisi edáýir artty
ASTANA. QazAqparat - Aǵymdaǵy jyldyń 7 aıynda elimizdiń ónerkásip óndirisiniń kólemi 5,1 paıyzǵa artty. Bul týraly búgin QR Investıtsııalar jáne damý mınıstrligi Indýstrııalyq damý jáne ónerkásiptik qaýipsizdik komıtetiniń tóraǵasy Almas Batanov aıtty, dep habarlaıdy QazAqparat tilshisi.
«Jyl basynan beri, jalpy alǵanda, jetekshilik etetin salalar ónerkásip óndirisiniń jaǵymdy ósý dınamıkasyn kórsetti. Osylaısha, 2018 jyldyń jeti aıynyń qorytyndysy boıynsha ónerkásip óndirisiniń kólemi 5,1 paıyzǵa, sonyń ishinde taý-ken óndirý ónerkásibi 5,4, óńdeýshi ónerkásip 4,9 paıyzǵa ósti. Taý-ken óndirý sektorynda temir rýdasyn óndirý kóleminiń 7,4 paıyzǵa óskeni baıqalady. Bul, «Sokolov Sarybaı taý-ken óndiristik birlestigi» AQ-nyń temir rýdasyn Qytaı Halyq Respýblıkasyna jetkizý eksportyn arttyra otyryp, óz kólemderin 10 paıyzǵa ulǵaıtýymen baılanysty boldy», - dedi ol.
Onyń dereginshe, tústi metaldar kenin óndirý kólemi 3,1 paıyzǵa ósti. Bul óndirý kólemderiniń qosymsha ósýimen, sondaı-aq tıisti tehnologııalardyń joqtyǵynan, 70 jyl boıy óńdelmegen Baqyrshy ken ornyn aǵymdaǵy jylǵy 26 maýsymda iske qosýmen baılanysty boldy. Búginde bul Qazaqstandaǵy altyn qory boıynsha eń iri ken oryndarynyń biri bolyp tabylady. Joba arqylyn 10 tonna altyn óndirý kózdelýde.
«Metallýrgııada óndiris kólemi 3,6 paıyzǵa ósken. Qara metallýrgııada ferroqorytpalar, ystyqtaı ılemdeý, bolat sharlar óndirisi kólemderiniń artýy esebinen ósim 4,8 paıyzdy qurady. Tústi metallýrgııa óndirisindegi ósý óńdelmegen myrysh, mys, altyn, glınozem, qola jáne basqa da óndiristiń artýy esebinen 2,6 paıyz boldy. Mysaly, «Qazaqmys korporatsııasy» JShS altyn óndirýdi 31 paıyzǵa ulǵaıtty», - dedi komıtet tóraǵasy.
Onyń dereginshe, aǵymdaǵy jyldyń sońyna deıin tazartylǵan altyn óndirý kólemin 20 tonnaǵa, qorǵasyn óndirisin 20 myń, alıýmınıı qorytpalaryn óndirisin 20 myń tonnaǵa ulǵaıtý kózdelip otyr.
