Qazaqstanda óndiris salasyna jasandy ıntellekti engizýdi kózdeıtin Jol kartasy bekitildi

ASTANA. KAZINFORM – Ónerkásip sektorynda jasandy ıntellektini engizýdi damytýǵa baǵyttalǵan Jol kartasy bekitildi.

Bul - jasandy ıntellektini óndiris salasynda qoldaný myqtap qolǵa alynǵanyn aıqyndaıdy.

Bul týraly ónerkásipti tsıfrlandyrý máseleleri boıynsha ótken jıynda aıtyldy. Kezdesýde jasandy júıeni jetildirý jáne qoldaný tetikteri talqylandy.

Demo Day-diń maqsaty – Qazaqstan kásiporyndarynda qoldanylyp jatqan jasandy ıntellekt salasyndaǵy praktıkalyq sheshimderdi kórsetý. Qazir eldegi barlyq sala jappaı sandyq formatqa aýysyp jatqanymen, jasandy ıntelekti engizgen óndiris oryndary saýsaqpen sanarlyq. 

– Tsıfrlandyrý baǵyt-baǵytymen damyp jatyr. biraq, barlyq jerge jasandy ıntellekt kirdi dep aıtýǵa áli erte, - deıdi Ónerkásip komıtetiniń tóraǵasy Azamat Panbaev. 

Máselen, byltyr kásiporyndardy tsıfrlandyrý deńgeıi 19 paıyzdy qurasa, bıyl osy kórsetkishti 23 paıyzǵa deıin kóterý mindeti tur. Endi osy 19 paıyzdyń ishinde tek onshaqty nysanda ǵana jasandy zeıin jumys isteıdi. 

Іs-sharaǵa Ónerkásip jáne qurylys mınıstrliginiń, sondaı-aq Jasandy ıntellekt jáne tsıfrlyq damý mınıstrliginiń basshylyǵy qatysty.

Demo Day aıasynda QR ÓQM Ónerkásip komıtetiniń, QazIndustry, aldyńǵy qatarly ónerkásiptik jáne ІT-kompanııalardyń ókilderi, sondaı-aq Astana Hub rezıdentteri óz usynymdaryn jasady.

Alańda ónerkásip salasyndaǵy jasandy ıntellektini damytý máseleleri talqylanyp, ónerkásiptik taldaýlar men boljaýlar usynylady, sondaı-aq kásiporyndarda II-dy engizýdiń sátti keısteri kórsetiledi.

Aıta keteıik, agroónerkásiptik keshendegi protsesterdi avtomattandyrý úshin jasandy ıntellekt agentteri engiziledi.