Qazaqstanda óndiris barysynda bolatyn qaıǵyly jaǵdaılar azaıdy
ASTANA. KAZINFORM - Qazaqstan eńbek qaýipsizdigin jáne eńbekti qorǵaýdy qamtamasyz etý boıynsha qabyldanǵan sharalardyń arqasynda bıyl óndiristik jaraqattaný deńgeıin 6,5%-ǵa jáne ólim-jitim 4,5%-ǵa azaıdy.
Bul týraly jyldy qorytyndylyǵan QR Eńbek jáne áleýmettik qorǵaý mınıstrliginiń Svetlana Jaqypovanyń quttyqtaýynda aıtylǵan.
Ondaǵy málimetterge qaraǵanda, memlekettik eńbek ınspektorlary 55,1 myńnan astam jumyskerdiń quqyǵyn qorǵady, onyń ishinde 10,1 myń azamattyń aldyndaǵy 2,2 mlrd teńge somasyndaǵy jalaqy boıynsha bereshek óteldi. Jalaqy boıynsha bereshek jáne eńbek quqyqtarynyń buzylýy anyqtalǵan kásiporyndardyń basshylaryna oryndalýy mindetti 3 781 nusqama berilip, 470,7 mln teńgeden astam somaǵa aıyppul salyndy.
- Múgedektigi bar adamdardyń ómir súrý sapasyn arttyrý boıynsha keshendi jumys júrgizilip jatyr. 50-den astam nozologııa boıynsha múgedektikti belgileýdiń syrttaı proaktıvti formaty belsendi iske asyrylyp keledi. Osy formatta Qazaqstannyń barlyq óńirinen 99,6 myńǵa jýyq ótinim qaraldy, onyń ishinde 66,2 myń isti densaýlyq saqtaý uıymdarynan tartylǵan táýelsiz sarapshylar qarady, - delingen habarlamada.
Sondaı-aq onda aǵzanyń qaıtymsyz ózgeristeri bar jekelegen nozologııalar boıynsha múgedektikti belgileýdiń erekshe tetigi boıynsha pılottyq joba iske asyrylyp jatqany aıtylǵan. Bul – aıaq-qol ampýtatsııasy, Daýn sındromy, balalardaǵy mýkopolısaharıdoz. Rásimder barynsha jeńildetildi jáne merzimder bir jumys kúnine deıin qysqartyldy.
Osyǵan deıin 2025 jylǵy 1 jeltoqsandaǵy jaǵdaı boıynsha jumyspen qamtýǵa járdemdesýdiń belsendi sharalarymen 296 myńǵa jýyq adam qamtylǵany týraly jazdyq.