Qazaqstanda jasalǵan turmystyq tehnıka EAEO naryǵyna baǵyttalady
ASTANA. KAZINFORM – Ekibastuzda temirjol klasterin odan ári damytý qarastyrylyp otyr. Bul týraly QR Ónerkásip jáne qurylys mınıstri Qanat Sharlapaev málim etti.
«Mashına jasaý salasynda bıylǵy 3 aıda óndiristiń ósýi 24,9 paıyzdy quraıdy. 2025 jylǵa qaraı turmystyq tehnıka óndirisin 360 myńǵa deıin (Silk Road Electronics – 301 470, ALMATY TURMYSTYQ TEHNIKA ZAVODY – 60 000), jeńil avtomobıldi 160 myńǵa deıin («SaryarkaAvtoProm» JShS - 110 myń jáne «Hyundai Trans Kazakhstan» JShS - 50 myń avtomobıl), sondaı-aq jolaýshylar vagondaryn 100-ge deıin, lokomotıvterdi 120-ǵa, platformalardy 500-ge, jartylaı vagondardy 1,5 myńǵa deıin ulǵaıtý josparlanǵan», - dedi Q. Sharlapaev Parlament Májilisindegi Úkimet saǵatynda.
Onyń aıtýynsha, orta merzimdi perspektıvada bul salada Ekibastuzda temirjol klasterin odan ári damytý mindeti tur.
«Klaster aıasynda jobalardy iske asyrý temirjol mashına jasaýdaǵy oqshaýlaý deńgeıin arttyrýǵa, onyń ishinde jolaýshylar vagondary óndirisindegi oqshaýlaý deńgeıin 50 paıyzǵa deıin jetkizýge múmkindik beredi (2030 jylǵa). Sonymen qatar, turmystyq tehnıka óndirisin (mınıstrlik málimetinshe, EAEO naryǵynda 9 mln dollardyń ónimine tapshylyq bar) qytaılyq HTC Corporation kompanııasy jáne Ońtústik Koreıanyń Samsung Electronics kompanııasy sııaqty jańa ınvestorlardy tartý arqyly (Investıtsııalar 12 mlrd teńge, qýaty 400 myń birlikke deıin) Saran qalasyndaǵy «Silk Road Electronics» JShS jumys istep turǵan kásiporyn bazasyn ulǵaıtý jumystary atqarylyp jatyr», - dedi mınıstr.
