Qazaqstanda óndirilgen kókónister qalaı saqtalady
ASTANA. KAZINFORM — Qazaqstanda jyl saıyn shamamen 3 mln tonna kartop jáne 2,5-3 mln tonna kókónis óndiriledi. Onyń basym bóligin kelesi jylǵa deıin saqtaıtyn qoımalar salynyp jatyr.
Aýyl sharýashylyǵy vıtse-mınıstri Nazgúl Hatepovanyń aıtýynsha, ónimdi saqtaý máselesi ásirese maýsymaralyq kezeńde mańyzdy. Bul kezeń shamamen 7-8 aıǵa sozylady.
— Ǵylymı negizdelgen qajettilik normalary boıynsha kartop, sábiz, pııaz jáne qyryqqabat sııaqty negizgi kókónis ónimderin saqtaý úshin 2,5-2,6 mln tonna kóleminde qoıma syıymdylyǵy qajet, ıaǵnı kelesi ónim jınalǵansha shamamen 2,5 mln tonna kókónisti saqtap qalýymyz kerek, — dedi vıtse-mınıstr Úkimette ótken brıfıngte.
Sońǵy jyldary elimizde kókónis qoımalaryn salý jáne jańǵyrtý boıynsha aýqymdy jumys júrgizilgen.
— Prezıdent tapsyrmasy aıasynda kókónis jáne kartop qoımalaryn salý men jańǵyrtýdyń keshendi jospary ázirlendi. 2023-2025 jyldary 700 myń tonnadan astam jańa saqtaý qýaty iske qosyldy. Osylaısha, qazirgi qoıma qýattary kókónis ónimderin kelesi jyldyń ónimi jınalǵansha saqtaýǵa jetkilikti, — dedi N. Hatepova.
Degenmen ónimniń belgili bir bóligi saqtaý, jınaý jáne tasymaldaý kezinde joǵalýy múmkin. Vıtse-mınıstr ǵylymı negizdelgen tabıǵı kemý normalary bar ekenin túsindirdi.
— Tıisti jaǵdaıda saqtalǵannyń ózinde kókónis ónimderiniń belgili bir mólsheri tabıǵı túrde kemıdi. Jalpy ónim kóleminiń shamamen 5-10% deıingi shyǵynǵa jol beriledi. Bul tek saqtaý kezinde emes, ónimdi jınaý jáne tasymaldaý kezeńderine de qatysty, — dep túsindirdi vıtse-mınıstr.
Buǵan deıin Nazgúl Hatepova eldegi kartop egý alqaby 5,5 myń gektarǵa kóbeıgenin, olardy saqtaıtyn qoımalar da jetkilikti ekenin aıtqan edi.
Kólik vıtse-mınıstri Jánibek Taıjanov Qazaqstan astyǵy qaı elderge kóbirek eksporttalatynyn baıandady.
