Qazaqstanda óndirilgen elektr energııasy tutynýdan 300 mln kVt/saǵatqa artyq boldy
ASTANA. KAZINFORM – Qazaqstanda bıylǵy alǵashqy bes aıdyń qorytyndysy boıynsha elektr energııasyn óndirý kólemi tutynýdan asyp tústi.
Energetıka mınıstrliginiń málimetinshe, qańtar-mamyr aılarynda elde 53,6 mlrd kVt/saǵat elektr energııasy óndirilse, tutyný kólemi 53,3 mlrd kVt/saǵatty qurady.
Osylaısha, elektr energııasyn óndirýdegi profıtsıt shamamen 300 mln kVt/saǵat deńgeıinde qalyptasty.
– Turaqty profıtsıt eldiń energetıkalyq júıesiniń teńgerimdi damýyn, generatsııalaıtyn qýattardyń turaqty jumysyn jáne ishki suranysty senimdi qamtamasyz etýdi kórsetedi, – dep habarlady Energetıka mınıstrligi.
Vedomstvonyń boljamynsha, 2026 jyldyń qorytyndysynda Qazaqstanda elektr energııasyn óndirý kólemi 126,5 mlrd kVt/saǵatqa jetedi.
Energetıkalyq qýattardy ulǵaıtý maqsatynda bıyl elde dástúrli jáne jańartylatyn energııa kózderi esebinen jalpy qýaty 2,6 GVt bolatyn jańa nysandar iske qosylady. Atap aıtqanda, tórt gaz stantsııasyn paıdalanýǵa berý jáne eki elektr stantsııasyn keńeıtý josparlanǵan.
Sonymen qatar jańartylatyn energııa kózderi salasynda da jańa jobalar júzege asyrylady.
– Bıyl elimizde 10 jańa jańartylatyn energııa nysany iske qosylady. Onyń ishinde tórt jel elektr stantsııasy, bes kún elektr stantsııasy jáne bir sý elektr stantsııasy bar, – delingen mınıstrlik aqparatynda.
Energetıka mınıstrliginiń málimetinshe, júzege asyrylyp jatqan jobalar 2027 jyldyń birinshi toqsanynyń sońyna qaraı energııa tapshylyǵyn tolyq joıýǵa múmkindik beredi.
– Bul jobalardy iske asyrý 2027 jyldyń birinshi toqsanynyń sońyna qaraı eldegi energııa tapshylyǵy máselesin tolyq sheshýge, al 2029 jylǵa qaraı elektr energııasy boıynsha turaqty profıtsıtke shyǵýǵa múmkindik beredi, – dep atap ótti vedomstvo.
Aıta keteıik, KEGOC 2035 jylǵa deıin 7 myń shaqyrym jańa elektr jelisin salýdy josparlap otyr.
