Qazaqstanda shyǵarylǵan armatýra qaı elderge eksporttalady

ASTANA. KAZINFORM — Bıylǵy birinshi jartyjyldyqta elimizde 510 myń tonna qurylys armatýrasy óndirilgen. 

Qazaqstandaǵy qurylys armatýrasynyń naryǵy negizinen kómirtekti bolat jáne bolattyń az qospalanǵan ónimderinen turady. Bul ónimder osy naryqtyń eń damyǵan segmentine jatady. 

Qurylys armatýrasy turǵyn úı, kommertsııalyq jáne óndiristik ǵımarattar qurylysynda, kópir, jol sııaqty ınfraqurylym obektilerin salýda qoldanylady.

Bıylǵy alty aıda elimizdegi qurylys armatýrasynyń óndiris kólemi 510 myń tonna boldy (2023 jyldyń deńgeıimen salystyrǵanda +13,5%), al ishki tutyný kólemi 782 myń tonnaǵa jetti (+11,6%).

Jetpegen qajettilik kólemi TMD elderinen aldyryldy. 

Esepti kezeńde qazaqstandyq ónim Tájikstan (62%) jáne Ózbekstan (22%) naryǵyna eksporttalǵan.

Qurylys armatýrasy segmentiniń ósý qory — 431 myń tonna.

Qazaqstanda armatýrany óndiretin negizgi kásiporyndar: Qarmet AQ (Qaraǵandy oblysy), «EvrazKaspıanStal» JShS (Qostanaı oblysy), KSP Steel JShS jáne «Kastıng» JShS (Pavlodar oblysy), «Taraz armatýra zaýyty» JShS» (Jambyl oblysy), SinYuanSteel, Ferrum-Vtor jáne Shymkent Temir JShS (Shymkent qalasy), Central Asia Fu Zhou Metal JShS (Almaty oblysy).

Bul kásiporyndardyń jobalyq jıyntyq qýaty — jylyna 1,9 mln tonna.