Qazaqstanda óndiristik jaraqattanýdyń eń joǵarǵy kórsetkishteri qurylys salasynda oryn alyp otyr

ASTANA. QazAqparat - Qazaqstanda óndiristik jaraqattanýdyń eń joǵarǵy kórsetkishteri qurylys salasynda baıqalýda. Bul týraly búgin eńbekti qorǵaý boıynsha halyqaralyq konferentsııa barysynda QR Densaýlyq saqtaý jáne áleýmettik damý mınıstrligi Eńbek, áleýmettik qorǵaý jáne kóshi-qon komıtetiniń tóraǵasy Aqmádı Sarbasov aıtyp ótti.

«Jumysqa baılanysty oqys oqıǵalardy taldaý nátıjesi kórsetkendeı, óndiriste jyl saıyn 2 myńnan astam oqys oqıǵalar oryn alady, onyń ishinde 300-i ólimge ákeledi, sonymen birge ólimniń 70%-dan astamy jumys berýshilerdiń kinálarynan týyndaıdy», - dedi ol.

Onyń atap ótýinshe, óndiristik jaraqattyń eń joǵarǵy kórsetkishi Qaraǵandy oblysyna tıesili (275 adam), odan keıin Shyǵys Qazaqstan oblysynda (228 adam), Qostanaı (171 adam), Pavlodar (170 adam), Aqtóbe oblystarynda (137 adam) jáne Almaty qalasynda (145 adam) baıqalady.

Ekonomıka salalaryna jiktegende, eń kóp zardap shekkender qurylys salasynda - 407 adam jáne taý-ken metallýrgııa kesheninde - 298 adam.