Qazaqstanda óndiristik jaraqattaný qaı óńirlerde jıi kezdesedi
NUR-SULTAN. QazAqparatm – Bıylǵy 1 qazandaǵy jaǵdaı boıynsha elimizdegi kásiporyndarynda 844 jazataıym oqıǵa oryn alyp, nátıjesinde 943 adam zardap shekken. Bul ótken jyldyń sáıkes kezeńinen 13 paıyzǵa tómen, dep habarlaıdy QazAqparat.
Eńbek jáne halyqty áleýmettik qorǵaý mınıstrligi málimetinshe, bıyl jazataıym oqıǵa saldarynan 111 adam qaıtys boldy, bul ótken jyldyń sáıkes kezeńinen 26 paıyzǵa tómen. 2018 jyldyń 9 aıynda 150 adam kóz jumǵan edi.
«Ekonomıka salalary bólinisinde zardap shekkenderdiń eń kóp sany taý-ken metallýrgııa kesheni kásiporyndarynda – 153 nemese 16,2 paıyz jáne qurylys salasynda – 121 nemese 12,8 paıyz. Óndiristik jaraqattanýdyń joǵary deńgeıi Shyǵys Qazaqstan (137 adam zardap shekti), Qaraǵandy (133 adam), Pavlodar (83 adam), Qostanaı oblystarynda (67 adam) jáne Almaty qalasynda (73 adam) saqtalýda», - delingen vedomstvo habarlamasynda.
Eńbekti qorǵaý salasynda neǵurlym jıi oryn alatyn buzýshylyqtar qyzmetkerlerdi oqytpaý jáne nusqama júrgizbeýge, qaýipsiz eńbek jaǵdaılaryn qamtamasyz etpeýge, jeke jáne ujymdyq qorǵaný quraldarymen, arnaıy kıimmen qamtamasyz etpeýge qatysty bolady.
«Jazataıym oqıǵalardyń kópshiligi zardap shegýshiniń bıiktikten qulaýynan (191 nemese 20,2%), qozǵalatyn, aınalatyn zattardyń áserinen (119 nemese 12,6%), zattardyń, materıaldardyń qıraýynan, opyrylýynan, qulaýynan (105 nemese 11,1%) bolǵan», - dep naqtylady mamandar.
