Qazaqstanda óndiriste zardap shekkender sany 10,7% azaıdy

NUR-SULTAN. QazAqparat – Sońǵy 5 jylda elimizde óndiriste zardap shekkender sany 10,7 paıyzǵa azaıdy. Bul týraly QR Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıteti tóraǵasynyń orynbasary – QR Bas memlekettik eńbek ınspektory Tólegen Ospanqulov aıtty, dep habarlaıdy QazAqparat tilshisi.

«Qabyldanǵan is-sharalardyń nátıjesinde sońǵy 5 jylda, naqtyraq aıtqanda 2016-2020 jyldar aralyǵynda óndiriste zardap shekkenderdiń sany 10,7 paıyzǵa, 1683-ten 1500 adamǵa deıin azaıdy. Onyń ishinde qaıtys bolǵandar sany 16,2 paıyzǵa tómendedi.

Statıstıka jónindegi ýákiletti organdardyń derekterine sáıkes, 2020 jyly zerttelgen kásiporyndardyń 1,6 mln jumysshysynyń 367 myń ne bolmasa árbir tórtinshisi zııandy jáne qaýipti jaǵdaıda jumys istegen. 2019 jyly bul kórsetkish 370 myń adamdy quraǵan bolatyn», - dedi Tólegen Ospanqulov Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, zııandy jáne qaýipti jaǵdaıda jumys isteıtin jumysshylardyń kópshiligi Qaraǵandy, Pavlodar, Shyǵys Qazaqstan jáne Mańǵystaý oblystarynda baıqalǵan.

«Joǵary shý jáne diril jaǵdaıynda shamamen árbir ekinshi, jumys aınalasyndaǵy aýanyń gazdanýy men shańdanýy jaǵdaıynda árbir úshinshi adam jumys istegen. 94 myń adam aýyr dene eńbegimen shuǵyldanǵan. Jumysshylardyń qolaısyz eńbek jaǵdaılary ekonomıkalyq shyǵyndarǵa alyp keletindigi barlyǵymyzǵa málim. Byltyr elimizde 672 myń jumysshy zııandy eńbek jaǵdaıynda jumys istegeni úshin 141 mln teńge somasynda túrli ótemaqy aldy. Bul kórsetkish 2010 jylmen salystyrǵanda 10 paıyzǵa joǵary», - dedi ol.