Qazaqstanda óndirilgen dári-dármekterdiń 30 paıyzy eksportqa shyǵady
ASTANA. 5 maýsym. QazAqparat - «FarmMedIndýstrııa» qaýymdastyǵynyń prezıdenti Serik Sultanovtyń oıynsha, qazaqstandyq farmatsevtıkalyq kompanııalar álemdik deńgeıde básekege túsetin bolady.
Bul týraly ol búgin Astanada halyqaralyq konferentsııa barysynda málim etti.
«Biz Qazaqstanda salynyp jatqan jańa farmatsevtıkalyq zaýyttardyń ónimderin memlekettik satyp alýlarǵa, bólshek saýdaǵa baǵyttaıtyn bolamyz. Al ónimniń 30 paıyzyn eksportqa shyǵaramyz», - dep atap ótti S.Sultanov.
Onyń aıtýynsha, búginde elimizde shetel ınvestorlarynyń qatysýymen birneshe zaýyt salynbaq. Odan shyǵarylǵan ónim sapasy álemde eń bedeldi GMP halyqaralyq standarttaryna sáıkes shyǵarylmaq.
«Qazaqstanda GMP halyqaralyq standarttaryna sáıkes farmatsevtıkalyq zaýyttardy salýǵa shetel ınvestorlaryn tańdaý barysynda Qytaı, Reseı, Ýkraına jáne Úndistan kompanııalary boldy. Biraq biz eýropalyq naryqta ornyqqan kompanııalardy tańdadyq. Bul bizdiń basty basymdyǵymyz. Mysaly, «Santo Member of Polpharma Group» óziniń ónimderin 50 elge taratady, «Abdi Ibrahim Global Pharm LLP» kompanııasy - 30 elge, al «Nobel» - 20 elden astam naryqqa shyǵyp otyr», - dedi ol.
