Qazaqstanda óńdeý ónerkásibi kórsetkishi ken ónerkásibinen basym tústi

ASTANA. QazAqparat - QR Ulttyq ekonomıka mınıstri Tımýr Súleımenov 2018 jyldyń 10 aıyndaǵy áleýmettik-ekonomıkalyq damý qorytyndylary boıynsha esep berdi, dep habarlaıdy QazAqparat tilshisi.

Mınıstrdiń aıtýynsha, ken óndirý ónerkásibine (4,6%) qaraǵanda óńdeý ónerkásibiniń (5,4%) ozyq ósý qarqyny baıqaldy. Osynyń esebinen 4,7% ósim baıqalǵan. 

«Óńdeý ónerkásibiniń ozyq ósýin negizgi óńdeý salalarynda jınaqtalǵan ósý qarqyndarynyń saqtalýymen túsindirýge bolady. Bul - mashına jasaý (14,2%-ke ósim), munaıdy qaıta óńdeý (9,2%-ke), hımııa ónerkásibi (8,5%-ke) jáne metallýrgııa (4,2%-ke) ónimderin óndirý», - dep atap ótti mınıstr Úkimet otyrysynda.

Bul rette, birqatar salalarda óndiristiń tómendeýi de baıqalady.

«Tómendeý farmatsevtıkada -4,6%, qurylys materıaldaryn óndirýde -1,7%, sýsyndar óndirisinde -0,8%, daıyn metall buıymdary óndirisinde -0,3% jáne kıim óndirisinde -0,1% qurady. Ken óndirý ónerkásibi 4,6% ósti. Ósý qarqyny temir kenin (+8,1%), kómir jáne lıgnıt (+5,2%), tabıǵı gaz (+4,9%), munaı (+4,8%) jáne tústi metaldar (+3,8%) óndirýdi ulǵaıtýǵa qatysty», - dedi T. Súleımenov.