Qazaqstanda óńdeý ónerkásibi damyp keledi

NUR-SULTAN. QazAqparat – QR Ulttyq ekonomıka mınıstri Rýslan Dálenov ónerkásip boıynsha joǵary jáne tómen nátıje kórsetken óńirlerdi atady, dep habarlaıdy QazAqparat.

«Jalpy ónerkásip óndirisi 0,4% ósti. Bul ósý óńdeý ónerkásibiniń 3,3% artýy esebinen boldy. Al ken óndirý ónerkásibi 1,5% tómendedi. Ónerkásip boıynsha ósim kóptegen óńirlerde baıqalady. Eń joǵary ósimdi Qostanaı (7,2%), Soltústik Qazaqstan (6,8%) oblystary men Nur-Sultan qalasy (5,5%) kórsetti», - dedi mınıstr Úkimet otyrysynda.

Taǵy 5 óńirde ónerkásiptiń tómendeýi baıqalǵan. Olar – Qyzylorda (-11,5%), Mańǵystaý (-5,9%), Aqtóbe (-2,9%), Shyǵys Qazaqstan (-1,5%) oblystary jáne Shymkent qalasy (-1,8%).

«Óńdeý ónerkásibi 3,3%-ke ósti. Ósýdiń joǵary qarqynyn farmatsevtıka, daıyn metall buıymdary, mashına jasaý, onyń ishinde avtomobılder jáne jeńil ónerkásip salasy kórsetip otyr. Óńirler boıynsha joǵary ósim Qostanaı (19,9%), Túrkistan (14,4%), Soltústik Qazaqstan (7,8%) oblystarynda baıqalady. 4 óńirde tómendeý tirkeldi. Olar – Aqtóbe (-4,9%), Batys Qazaqstan (-1,2%) jáne Shyǵys Qazaqstan (-0,7%) oblystary jáne Shymkent qalasy (-1,8%)», - dedi R. Dálenov.