Qazaqstanda óńdelmegen teri eksportyna qatysty másele qandaı

NUR-SULTAN. QazAqparat – Qazaqstanda óńdelmegen iri qara terisiniń eksporty kezinde alynatyn baj salyǵy qaldyrylady. Bul jaıynda Májilis depýtattarynyń saýalyna QR Premer-Mınıstriniń orynbasary – Saýda jáne ıntegratsııa mınıstri Baqyt Sultanovtyń jaýabynda aıtylǵan, dep habarlaıdy QazAqparat tilshisi.

«Óńdelmegen terilerdi áketýge qatysty eksporttyq keden bajyn alyp tastaýdyń oryndylyǵy máselesi birneshe ret kóterildi. 2022 jylǵy 8 aqpanda jáne 21 sáýirde bul másele Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń otyrysynda qaraldy. Onyń qorytyndysy boıynsha 2021 jylǵy qoldanylǵan óńdelmegen terilerge qatysty nóldik bajdyń áserine taldaý júrgizildi jáne eksporttyq kedendik bajdy joıýdyń orynsyzdyǵy týraly sheshim qabyldandy», - dep atap ótedi Baqyt Sultanov jaýabynda.

Onyń dereginshe, qazirgi ýaqytta respýblıkada qýaty jylyna 4 mln terige deıin iri qara mal terisin óńdeıtin 10-nan astam bylǵary kásiporny jumys isteıdi. Máselen, 2022 jylǵy qańtar-mamyr aılarynda 254 myń dana iri qara mal terisi qaıta óńdeldi. Onyń ishinde bylǵary óndirisi 70 paıyzǵa ósip, 71 mln sharshy dm qurady. Ilengen bylǵary eksporty 6,5 esege artty. 2020-2021 jyldary Semeı jáne Arqalyq qalalarynda buryn toqtap turǵan bylǵary zaýyttarynyń kásiporyndary qaıta iske qosyldy. 2022 jylǵy mamyr aıynda Taraz bylǵary zaýyty iske qosyldy. Ol 2017 jyldan 2022 jylǵa deıin toqtap turdy. Qazirgi ýaqytta Qytaı men Túrkııa elderiniń kásiporyndary tarapynan bylǵary satyp alý boıynsha suranys túsip jatyr.

«2021 jyly túrik ınvestorynyń qatysýymen Almaty oblysynda jalpy quny 9,8 mlrd teńge bolatyn jelatın óndiretin zaýyttyń («Halavet KZ» JShS) qurylysy bastaldy. Ol kúnine 500 tonna (25 myń dana) iri qara mal terisin óńdeýge múmkindik beredi. Bul rette ınvestordyń negizgi sharttarynyń biri shekteý sharalaryn engizý arqyly shıkizatpen qamtamasyz etý bolyp tabylady. Jobany iske qosý 2023 jylǵy mamyr aıyna josparlanǵan. Baıandalǵandy eskere otyryp, sondaı aq otandyq óndiristi damytý maqsatynda qoldanystaǵy kedendik áketý bajdaryn óńdelmegen iri terilerge qaldyrý oryndy dep sanaımyz. Bul rette, qajet bolǵan jaǵdaıda ýákiletti memlekettik organ óńdelmegen usaq terilerge baj salyǵyn alyp tastaý máselesin qarastyratyn bolady», - dedi ol.

Foto: bgleatherbags.com