Qazaqstanda ondaǵan myń lıtr alkogoldik ónim tárkilendi
ASTANA. QazAqparat - 2015 jyldyń úshinshi toqsanynda alkogoldik ishimdiktiń 33 myńnan astam shólmegi tárkilendi. Bul týraly Astanada ótken baspasóz máslıhatynda QR Qarjy mınıstrligi Memlekettik kirister komıtetiniń resmı ókili Jambyl Suraǵanov málim etti.
Onyń sózine qaraǵanda, jalpy bıylǵy jyldyń úshinshi toqsanynda alkogoldik ónimniń aınalymy salasynda 89 reıdtik tekserý júrgizilip, 12 031 000 teńgege aıppul salynǵan.
«Jalpy somasy 9 946 000 teńgeni quraıtyn alkogoldik ónim quıylǵan 33 694 shólmek tárkilendi. Onyń ishinde alkogoldik ónimdi jóneltpe qujatynsyz satý faktileri boıynsha 23 278 shólmek, eseptik qadaǵalaý markasynyń bolmaýy jáne onyń túpnusqalyǵy faktilerine baılanysty 2 054 bótelke, sondaı-aq tirkeý esebine qoımastan alkogoldik ónimderdi satý turǵysynda 8 362 shólmek anyqtaldy»,-dedi J. Suraǵanov.
Osy oraıda komıtet ókili zańsyz alkogoldik ónimdi anyqtaýǵa negizdelgen WIPON mobıldik qosymshasynyń tıimdiligi týraly aıtyp berdi. Búginde bul qosymsha Qazaqstannyń barlyq azamattaryna qoljetimdi.
