Qazaqstanda ómirlik mańyzy bar dári-dármekterdiń 37%-y óndiriledi

ASTANA. KAZINFORM — DDU usynǵan ómirlik mańyzdy dárilerdiń tiziminde búgingi tańda otandyq preparattardyń úlesi 37%-ǵa jetedi, dep habarlaıdy Densaýlyq saqtaý mınıstrliginiń baspasóz qyzmeti.

— Bul degenimiz — sozylmaly aýrýlardy emdeý, shuǵyl kómek kórsetý jáne reanımatsııa úshin eń qajetti dári-dármekter bizdiń azamattarymyz úshin turaqty qoljetimdilikti qamtamasyz ete otyryp, el ishinde jıi jasalady, — dep atap ótti Densaýlyq saqtaý mınıstri Aqmaral Álnazarova.

Іri qazaqstandyq farmatsevtıkalyq kompanııalar TMKKK jáne MÁMS sheńberinde preparattardy turaqty jetkizip, ulttyq dárilik qaýipsizdikti nyǵaıta otyryp, naryqta belsendi jumys istep keledi.

Vedomstvo atap ótkendeı, halyqaralyq naryqtarǵa shyǵý jáne otandyq preparattarǵa degen senimdi arttyrý úshin kúshti retteý júıesi óte mańyzdy. DDU baǵalaý qorytyndysy boıynsha Qazaqstan 8 negizgi ındıkator boıynsha joǵary kórsetkishterge ıe boldy jáne damýshy elder úshin eń joǵary — jetilýdiń 3 deńgeıin rastaýǵa kóship jatyr. 2026 jyldyń birinshi jartysynda bul mártebe resmı túrde tanylady dep kútilip otyr.

Sonymen qatar, jańa zamanaýı zerthanalyq keshen qurylyp jatyr, ol dári-dármekterdiń sapasyn baqylaýdy kúsheıtedi jáne qazaqstandyq óndirýshilerge halyqaralyq naryqtarǵa senimdi túrde shyǵýǵa kómektesedi.

Budan buryn Qazaqstan Ortalyq Azııada dári-dármekti tańbalaýdyń tolyq tsıklin bastaǵan jalǵyz el bolǵanyn jazǵan edik.