Qazaqstanda ómirlik qıyn jaǵdaıda qalǵan adamdarǵa qoldaý kórsetý erejeleri jańartyldy

ASTANA. KAZINFORM – QR Eńbek jáne halyqty áleýmettik qorǵaý mınıstrligi ómirlik qıyn jaǵdaıda qalǵan adamdar men otbasylarǵa keshendi qoldaý kórsetý boıynsha jumys tártibine ózgerister engizdi.

Jańa buıryq 2026 jylǵy 10 naýryzdan bastap kúshine enedi.

Jańartylǵan erejeler ómirde qıyndyqqa tap bolǵan azamattardy anyqtap, olarǵa kómek kórsetý úshin bilim berý, densaýlyq saqtaý, áleýmettik qorǵaý, jumyspen qamtý, mádenıet, sport, týrızm, ishki ister jáne basqa da memlekettik organdardyń birlesip jumys isteý tártibin aıqyndaıdy. Sondaı-aq, quqyqbuzýshylyqtar, zorlyq-zombylyq jáne áleýmettik táýekelderdiń aldyn alýǵa erekshe kóńil bólinedi.

Árbir adam nemese otbasy úshin Otbasyn qoldaý ortalyǵy jeke jumys josparyn ázirleıdi. Bul jospar áleýmettik ońaltý, beıimdelý jáne ómirlik qıyn jaǵdaıǵa qaıta túsý táýekelderin azaıtýdy kózdeıdi. Memlekettik organdar óz quzyreti sheginde kómek kórsetip, jospardyń oryndalýy týraly aqparat berýge mindetti, al ortalyq atqarylǵan sharalardyń tıimdiligin baqylaıdy.

Jańa erejeler azamattardyń ótinishin kútpesten otbasynyń áleýmettik jaǵdaıyn baǵalaý jáne olarǵa belsendi qoldaý kórsetý úshin tsıfrlyq otbasy kartasyn qoldanýdy qarastyrady. Vedomstvoaralyq jumystyń tıimdiligin baqylaý jáne qoldaý sharalaryn túzetý úshin monıtorıng pen taldaý toqsan saıyn júrgiziledi.

Buǵan deıin biz ómirlik qıyn jaǵdaıǵa tap bolǵan adamdardyń onlaın qalaı kómek alatynyn jazǵan edik.