Qazaqstanda ómir sapasynyń biryńǵaı ulttyq standarty engizilýi múmkin
ASTANA. KAZINFORM – Joǵary aýdıtorlyq palata tóraǵasy Álıhan Smaıylov Májilistiń jalpy otyrysynda halyqtyń ómir súrý sapasynyń biryńǵaı ulttyq standartyn engizýdi usyndy.
«Bıýdjet shyǵystary shamamen 100 protsentke atqarylǵan. Alaıda ortalyq memlekettik organdar makroekonomıkalyq ındıkatorlardyń 12 protsentine qol jetkizbegen. Bul rette qol jetkizilmegen ındıkatorlar ekonomıkanyń damýyna jáne halyqtyń ál-aýqatyna qalaı áser etkeni Úkimettiń esebinde ashyq kórsetilmegen. Budan Qarjy mınıstrliginiń 2022 jyly ázirlegen áleýmettik-ekonomıkalyq áserdi baǵalaý ádistemesi tolyqqandy jumys istemegenin kóremiz», - dedi Álıhan Smaıylov.
Onyń paıymdaýynsha, bıýdjet ákimshileri ekonomıkalyq áserlerdi boljap, baǵalaýdy úırengenimen bıýdjetti qalyptastyrý, ony atqarý kezinde halyqtyń ómir sapasyna áserin baǵalamaıdy.
«Bul bıýdjettiń barynsha áleýmetke baǵdarlanýy jaǵdaıynda bolyp otyr. Osyǵan baılanysty Halyqtyń ómir súrý sapasynyń biryńǵaı ulttyq standartyn engizý usynylady. Bul qazaqstandyqtardyń ál-aýqatyna memlekettik bıýdjet shyǵystarynyń tıgizetin áserin eseptep, baǵalaý úshin qajet», - dedi Joǵary aýdıtorlyq palata tóraǵasy.
