Qazaqstanda omıkron shtamy taralmas úshin qandaı sharalar qolǵa alynǵan

NUR-SULTAN. QazAqparat – Elordanyń bas memlekettik sanıtarlyq dárigeri Sarhat Beısenova elordada koronavırýspen aýyrǵandardyń statıstıkasyn jarııalady, dep habarlaıdy QazAqparat.

«DDSU koronavırýs ınfektsııasynyń jańa shtamy omıkrondy tirkedi jáne ony alańdaýshylyq týdyratyn nusqa retinde tanydy. Omıkron qatarynan 32 mýtatsııadan turady jáne deltaǵa qaraǵanda anaǵurlym juqpaly», - dedi Sarhat Beısenova ákimdikte ótken brıfıngte.

Onyń aıtýynsha, jańa shtamdy respýblıka aýmaǵyna engizbeý maqsatynda vedomstvoaralyq komıssııa bıylǵy 3 jeltoqsannan bastap mynadaı sharalar qabyldady:

- Qazaqstanǵa 11 elden (Botsvana, OAR, Lesoto, Namıbııa, Zımbabve, Mozambık, Madagaskar, Esvatını, Tanzanııa, Malavı jáne Gonkong) shetel azamattarynyń kirýi shekteldi.

- Omıkron shtamynan týyndaǵan KVI jaǵdaılary anyqtalǵan elden kelgen adamdar: Izraıl, Chehııa, Nıderlandy, Belgııa, Ulybrıtanııa, Italııa, Germanııa, Avstralııa, Kanada jáne Egıpet vaktsınalanǵanyna qaramastan mindetti túrde 72 saǵattan keshiktirmeı PTR testileýden ótedi.

- odan bólek, «omıkron» týdyrǵan KVI jaǵdaılary anyqtalǵan elderden kelgen adamdar PTR-testiniń nátıjesine qaramastan 7 kún merzimge úı karantınine jiberiledi.