Qazaqstanda ólim azaıdy, ómir súrý uzaqtyǵy artty – mınıstr MÁMS týraly synǵa jaýap berdi

ASTANA. KAZINFORM – Densaýlyq saqtaý mınıstri Aqmaral Álnazarova Mindetti áleýmettik medıtsınalyq saqtandyrý mehanızminiń nátıjesin baıandap, Parlament synyna jaýap berdi.

− Mindetti áleýmettik medıtsınalyq saqtandyrýdyń engizilýi densaýlyq saqtaý salasyn qarjylandyrý kólemin 3 esege – 1 trln-nan 2,9 trln teńgege deıin ulǵaıtýǵa múmkindik berdi. Bul salanyń kóptegen baǵyttaryn qarjylyq resýrstarmen barynsha tolyqtyrdy. Onyń ishinde dárigerler jalaqylarynyń 2,3 ese óskenin aıtyp ketken jón. Turǵyndardyń medıtsınalyq kómekke jumsalatyn qalta shyǵyndary 34%-dan 28%-ǵa deıin azaıdy. Alaıda áli de joǵary bolyp qalyp otyr, - dedi A. Álnazarova.

Mınıstrdiń aıtýynsha, densaýlyq saqtaý salasyndaǵy qarjylandyrýdyń barlyq kózinen bólinetin shyǵys kólemi jalpy ishki ónimniń 4%-yna jetti.

− Mindetti áleýmettik medıtsınalyq saqtandyrý júıesiniń engizilý merzimi «COVID-19» pandemııasymen qatar keldi. Oǵan qosa, jarnapuldardyń bastapqy parametrleri 1,4 jáne 3,5 esege qysqartyldy. Bul bıýdjettiń kiris bóligine áser etti. Mundaı jaǵdaıda kiris bólikti kezeń-kezeńimen ulǵaıtyp, jarnapuldardyń bastapqy parametrlerin qaıtarý nemese qabyldaǵan kepildikterdi qaıta qaraý kerek. Osy maqsatta ótken jyly birneshe máseleniń sebepterin anyqtap, sheshý úshin zertteýler júrgizdik, - deıdi spıker.

Vedomstvo basshysy Prezıdent tapsyrmasymen halyqtyń osal toptaryna medıtsınalyq kómekke qoljetimdiligin jetildirý, medıtsınalyq kómektiń biryńǵaı paketin qalyptastyrý jumystary júrip jatqanyn aıtýda.

Búgingi tańda qazaqstandyqtardyń 83% mindetti áleýmettik medıtsınalyq saqtandyrý júıesine qosylǵan. Olardyń ishinde 72% memleket tarapynan qamtamasyz etilip otyrǵan osal toptardaǵy azamattar. Atalǵan turǵyndar medıtsınalyq kómektiń tolyq qoljetimdiligine ıe. Sondaı-aq, MÁMS júıesin engizgeli elimizde medıtsınalyq-demografııalyq kórsetkishter jaqsarǵany aıtyldy.

2019 jyldan búginge deıin aýyldyq densaýlyq saqtaý salasyn qarjylandyrý 3 esege (254 mlrd tengeden 776,6 mlrd teńgege deıin), joǵary tehnologııalyq medıtsınalyq kómekti qarjylandyrý 2,7 ese ulǵaıyp, turǵyndarǵa joǵary tehnologııaly (protezdeý, stentteý, aorta koronarlyq shýnttaý, transplantatsııa, EKU) medıtsınalyq kómekti qoljetimdi etti.

− Atap aıtsaq, jalpy ólimniń 8%-ǵa, onyń ishinde náreste jáne ana ólimi tómendedi, al kútiletin ómir súrý uzaqtyǵynyń kórsetkishi 75 jasqa ulǵaıdy, - dedi A. Álnazarova.

Búgin Májilis tóraǵasynyń orynbasary Danııa Espaeva Úkimet saǵatynda adamdardyń medıtsınalyq qyzmetterdiń kórsetilýine qanaǵattaný deńgeıi tómendegenin, MÁMS-ke qatysty berilgen naqty usynystar oryndalmaı otyrǵanyn aıtqan edi.