Qazaqstanda Olımpıada oıyndaryn ótkizýge múmkindik pen tájirıbe bar - Koreıa Elshisi
ASTANA. QazAqparat - Koreıanyń Qazaqstandaǵy Elshisi Kım Desık 2018 jyly Phenchhanda ótetin qysqy Olımpıada oıyndaryna daıyndyqqa qatysty aıtyp berdi, dep habarlaıdy QazAqparat.
«Bizdiń oıymyzsha, Qazaqstan sporttyq derjava bolyp tabylady. Qazaqstanda qysqy sport túrleri óte tanymal ekeni belgili. Sondyqtan da Phenchhandaǵy Olıpıada oıyndary jaıynda egjeı-tegjeıli aqparat berýge tyrysýdamyz», - dedi Elshi tilshilermen kezdesý barysynda.
Eske sala keteıik, XXIII qysqy Olımpıada oıyndary alaýy 2018 jyly 9 aqpan kúni Phenchhan qalasynda tutanady. Álem dodasy 25 aqpanǵa deıin jalǵasady. Sonymen qatar 9-18 naýryz aralyǵynda Paralımpıadalyq oıyndar ótedi.
Uıymdastyrýshylar aıtýly sharanyń ashylý saltanaty tańǵalarlyq deńgeıde bolatynyn málimdedi. ıAǵnı ashylý rásimi 9 aqpanda jergilikti ýaqyt boıynsha saǵat 19:00 kezinde 35 myń kórermenge arnalǵan Phenchhandaǵy bas stadıonda ótedi. Jalpy sporttyq shara aıasynda 12 nysan jumyldyrylmaq.
«Koreıa aqparattyq tehnologııalar salasynda óte jaqsy damyǵan. Olımpıada oıyndaryn ótkizý kezinde sońǵy býyndy tehnologııalardy engizýge nıettimiz, onyń ishinde 5G jelisi de bar. Jeltoqsannyń orta kezinde Inchhon áýejaıy men Phenchhan qalasy arasynda joǵary jyldamdyqty poıyzdy iske qospaqpyz», - dedi Elshi.
Kım Desıktiń atap ótýinshe, Olımpıada men Paralımpıada oıyndary qonaqtaryn qarsy alýǵa 20 myń erikti jumyldyrylmaq. Erikti ataný úshin 145 elden 90 myńnan astam adam ózara talasqa túsken eken.
Qazaqstan men Koreıa arasynda 30 kúnge vızasyz rejim bolsa da, dıplomat Olımpıada oıyndaryna barýǵa nıetti qazaqstandyqtarǵa barynsha kómek kórsetýge ýáde etti. Osy oraıda Koreıa jaǵy Oıyndardy ótkizý kezeńinde Astana men Almatydan tikeleı áýe reısteriniń jıiligin arttyrýǵa daıyn.
Sonymen qatar Elshi myrza bolashaqta Qazaqstan da Olımpıada oıyndaryn ótkizetinine úmit artty.
«Meniń oıymsha, bolashaqta Qazaqstannyń Olımpıada oıyndaryn ótkizý múmkindigi joǵary. Sizderde ol úshin barlyq múmkindik men tájirıbe bar. Osy elde Azııa oıyndary men Ýnıversıada ótti. «Alaý» sport saraıyndaǵy muzdyń sapasy joǵary ekenin baıqap júrmiz. Osy oraıda bundaı sapa ózge de sporttyq nysandarda qarastyrylǵanyn bilemin. Jalpy, sporttyq baǵytta Qazaqstan Koreıaǵa qaraǵanda alda kele jatyr dep oılaımyn», - dep túıindedi sózin ol.
