Qazaqstanda «Olımpıada kúni» ótedi
ASTANA. 17 mamyr. QazAqparat - Mamyrdyń 19-y kúni Qazaqstanda «Olımpıada kúni» is-sharasy ótedi.
Onyń aıasynda barlyq oblys ortalyqtarynda, sondaı-aq Astana jáne Almaty qalalarynda san alýan sport saıystary uıymdastyrylady. Budan basqa, «Olımpıadalyq jarystar» taqyrybynda sýretter konkýrsy, «2012 London Olımpıadasy» zııatkerlik oıyny, ulttyq sport túrlerinen arnaıy jarystar ótkizý josparlanǵan. «Olımpıada kúni» is-sharasyna qatysqandardyń barlyǵyna Halyqaralyq Olımpıada komıtetiniń prezıdenti Jak Roggeniń qoly bar kýálikter, al jeńimpazdarǵa QR Ulttyq Olımpıada komıtetiniń arnaıy syılyqtary tabystalady. Sondaı-aq demeýshilerdiń jeke syı-syıapattary taratylady.
Aıta keteıik, buǵan deıin «Olımpıadalyq júgirý kúni» retinde atalyp ótken meıram sońǵy jyldary «Olımpıada kúni» bolyp toılanyp keledi. Sebebi onyń aıasynda tek júgirý jarystary ǵana emes, sonymen qatar sporttyń basqa da túrleri boıynsha saıystar ótkiziledi. Negizgi maqsat - halyq arasynda salaýatty ómir saltyn nasıhattap, barlyq qazaqstandyqtardy sportqa tartý.
