Qazaqstanda olımpıada chempıony Bekzat Sattarhanov týraly kórkem fılm túsirilýde

QazAqparat agenttiginiń tilshisi osyǵan oraı, rejısserdiń ózimen habarlasyp, kıno jaıynda aqparat alǵan bolatyn. 

«Bekzat» atty kartına 20 jasynda Olımpıada oıyndarynyń chempıony atanǵan erekshe qabiletti boksshynyń ómiri jaıly bolmaq. Bekzat Sattarhanov Qazaqstannyń eń daryndy ári sensatsııalyq sportshysy retinde esimi el esinde qaldy. 1999 jyly eresek boksqa aýysqan balǵyn Bekzat, kelesi jyly Olımp shyńyn baǵyndyryp, kók Baıraǵymyzdy Sıdneı aspanynda jelbiretti. 4 aıdan keıin Bekzat jol-kólik apatynda qaıtys boldy.   

«Biz qazirgi ýaqytta túsirilim úderisiniń ýaqyty jaıynda oılanyp jatqan joqpyz. Sebebi búgin bizdiń aldymyzda asyqpaı, jaqsy kınony jasap shyǵarý mindeti tur. Bekzat týraly fılm túsirý - úlken jaýapkershilik. Ol - halyq qaharmany, ultynyń maqtanyshy. Biz jobaǵa tyńǵylyqty daıyndalýdamyz. Fılm Bekzattyń týystaryna, jaqyndary men dos-jarandaryna unaý úshin, árıne, barsha halyqtyń kóńilinen shyǵýy úshin qolymyzdan kelgenin jasaımyz», - dedi E.Shahmet.

Onyń sózine qaraǵanda, týyndymen onyń «Shahmet Omniars» prodıýserlik kompanııasy aınalyspaq. Túsirilim kelesi jyldyń sáýir aıynda bastalady. Qazir rejısserlik stsenarıı jazylýda. Sonymen qatar akterlerdiń kastıngisi júrip jatyr. Rejısserdiń aıtýynsha, basty keıipkerdi, qazaqstandyq bokstyń ańyz boksshysyn Asylhan Tólepov («Jaýjúrek myń bala») somdaıdy. Fılmge basqa da otandyq tanymal akterler men sportshylar túsedi. Kınonyń mýzykasyn jazýǵa eýropalyq kompozıtor, Italııanyń ekinshi prezıdenti Lýıdjı Eınaýdıdiń nemeresi - Lıýdovıko Eınaýdı shaqyrylǵan.  

«Fılm álemdik masshtabta bolady dep kútip otyrmyz. Biz ony qazaqstandyq kınosúıer qaýymmen qatar, sheteldik kórermenderdiń de kórgenin qalaımyz. Biz basqa kınostýdııalarmen áriptestik jasasýǵa daıynbyz», - dep atap ótti E.Shahmet.