Qazaqstanda ólim-jitim 9,6%-ǵa azaıdy

NUR-SULTAN. QazAqparat – Qazaqstan adam óliminiń kórsetkishi boıynsha 225 eldiń ishinde 85-orynda tur. Bul týraly QazAqparat Ranking.kz resýrsyna silteme jasap habarlaıdy.

«Qazaqstan 2022 jyly ólim-jitim deńgeıiniń reıtınginde 225 eldiń ishinen 85-orynǵa turaqtady. Bul shama 1 000 adamǵa shaqqandaǵy ólim kórsetkishi boıynsha túzilgen. Qazaqstan koeffıtsenti 8,11 bolyp tirkeldi. Tizimniń eń basynda Serbııa, Rýmynııa, Lıtva tursa, eń az kórsetkish Katarǵa tıesili», - delingen saraptamada.

Birinshi jartyjyldyqta Qazaqstanda 69,2 myń adam qaıtys bolǵan. Bul – byltyrǵy mólsherden 9,6% az.

«Óńirler arasynda Almaty oblysynda ólim-jitim kóp tirkeldi – 7,4 myń adam. Sondaı-aq, Shyǵys Qazaqstan men Qaraǵandy oblystarynda ólim-jitim ózge óńirlerge qaraǵanda kóp. Ólim-jitim eń az tirkelgen óńir – Mańǵystaý (1,5 myń adam)», - dep jazady Ranking.kz.

Resmı derek boıynsha, eldegi ólim-jitimniń eń jıi kezdesetin sebebi – qan aınalym júıesiniń aýrýlary, bul dertten 15,6 myń adam kóz jumǵan», - delingen materıalda.