Qazaqstanda oqýshylar baǵdarlamalaýdyń qyr-syryn Minecraft arqyly úırenedi

ASTANA. QazAqparat - QR Bilim jáne ǵylym mınıstrligi ınformatıka synyptaryn álemge tanymal Minecraft oıyny bazasynda bloktyq baǵdarlamalaýmen qamtylǵan kompıýterlermen qamtamasyz etpek, dep habarlaıdy QazAqparat.

"ІT bilim bizde úshinshi synyptan bastap oqytylady. Degenmen odan da erterek oqytqan jurys bolar edi. Atap aıtqanda, ınformatıka synyptarynyń bilim berý baǵdarlamalaryn zamanaýı etý mańyzdy. Bul rette Microsoft jáne  Google kompanııalarymen birlese jumys isteýdemiz. Ekinshi mańyzdy baǵyt Dúnıejúzilik bank qaryzy aıasynda barlyq ınformatıka synyptaryn birkelki kompıýterlermen qamtamasyz etý. Olarda Minecraft bazasynda bloktyq baǵdarlamalaý bolady. Eger jospar oıdaǵydaı iske assa, onda bıyl osy baǵdarlamany orta býynnan 11 synyp aralyǵynda bastaımyz", - dedi QR BǴM basshysy QR Prezıdenti Nursultan Nazarbaevtyń qatysýymen ótip jatqan «Nur Otan» Saıası keńesiniń keńeıtilgen otyrysynda.

Óz kezeginde Elbasy tsıfrlandyrýdy bilim salasymen qatar, barsha ekonomıkada qamtý kerektigin qadap aıtty.

"Máýlen Áshimbaev ("Nur Otan" partııasy Tóraǵasynyń birinshi orynbasary) partııanyń tsıfrlyq saladaǵy jumystaryn baıandap berdi. Biz barsha Qazaqstandy bul ıdeıaǵa nazar aýdartýymyz kerek. Bunyń barlyǵyn bekerge aıtylyp turǵan joq, iske asyratyn mezgil jetti", - dedi Elbasy QR Premer-Mınıstriniń orynbasary Asqar Jumaǵalıevke qaratyp aıtqan sózinde.

Prezıdent bul salany ilgeriletýge, jobalardy ázirleýge qaýqarly talantty adamdardy anyqtap, irikteýge nazar aýdarý qajettigin tapsyrdy.

Aıta keteıik, Microsoft mamandary balalardy oqytýǵa arnalǵan tuǵyrnamany daıarlap shyqty. Bul óz kezeginde Minecraf oıyn álemimen ózara is-qımyl arqyly baǵdarlamalaýdyń negizderin oqytýǵa múmkindik beredi.