Qazaqstanda oqýǵa nıetti qandastarǵa bólinetin kvotany ulǵaıtý qajet - Qarlyǵash Bekpatshaqyzy

Bıyl Qazaqstannyń joǵary oqý oryndarynda bilim alýǵa nıet bildirgen sheteldegi 2 100 qandas qujat tapsyrdy. Bul týraly Dúnıejúzi qazaqtar qaýymdastyǵy Astana qalalyq fılıalynyń basshysy Qarlyǵash Bekpatshaqyzy aıtty, dep habarlaıdy QazAqparat tilshisi.

«Bizdiń joǵary oqý oryndaryna túsý úshin 2 100 bala qujat tapsyrdy. Olar onlaın rejımde joldaıdy. Bıyl birinshi ret bul júıe tsıfrlyq formatqa aýysyp jatyr. Sondyqtan olqylyqtar da joq emes. Qujat tapsyrǵan balalar: «Biz qujat tapsyrdyq, biraq nege emtıhanǵa qatyspaımyz?» dep habarlasyp jatyr. Biz bul suraqtardy joǵary oqý oryndaryna jiberip, sheshýge tyrysýdamyz. Nátıjesi 1-2 kúnde belgili bolady. 1 300 balaǵa kvota bólingen. Endi qalǵan qujat tapsyrǵan 800 balany qaıda jiberemiz?! Sondyqtan mınıstrlik qosymsha kvota bólýi qajet dep esepteımiz. Biz ony hat túrinde de joldaımyz. Óıtkeni, balalar úmitpen kútip otyr», - dep málim etti Qarlyǵash Bekpatshaqyzy.

Qosa ketsek, búgin elordada Dúnıejúzi qazaqtar qaýymdastyǵynyń janynan qurylǵan qoǵamdyq keńestiń alǵashqy otyrysy ótti. Onda shetelde júrgen 7 mıllıonǵa jýyq qandasymyzdy elge qaıtarý tóńiregindegi máseleler talqylandy.