Qazaqstanda ókpeniń sırek aýrýyna shaldyqqan patsıentke alǵash ret kúrdeli ota jasaldy
ASTANA. KAZINFORM – Ulttyq ftızıopýlmonologııa ǵylymı ortalyǵy dárigerleri ókpeniń sırek kezdesetin aýrýyna shaldyqqan patsıentke alǵash ret ókpeni tolyq shaıý ádisin sátti júrgizdi.
Medıtsınalyq ortalyqtyń málimetinshe, emshara ókpeniń alveolıarlyq proteınozy dıagnozy qoıylǵan patsıentke jasalǵan.
Joǵary tehnologııalyq ota endoskopııa bólimshesinde birsańylaýly ıntýbatsııalyq tútik pen keýde qýysyna vıbromassaj jasaý ádisin qoldaný arqyly oryndaldy.
Operatsııany endoskopıst dáriger Bahtııar Turǵymbaev reanımatsııa bóliminiń mamandarymen, torakaldyq hırýrgtermen jáne pýlmonologtarmen birlesip júrgizgen.
33 jastaǵy patsıent ortalyqqa aýyr jaǵdaıda jetkizilgen. Dárigerler onyń aıqyn tynys jetkiliksizdigi bolǵanyn aıtty.
– Naýqas aýrýhanaǵa túsken kezde satýratsııa deńgeıi shamamen 80%-dy qurady, – dep málimdedi mamandar.
Júrgizilgen emnen keıin patsıenttiń jaǵdaıynda oń ózgerister baıqalǵan.
Atap aıtqanda, satýratsııa deńgeıi 95-97%-ǵa deıin kóterilip, tynys alý qyzmeti men jalpy jaǵdaıy edáýir jaqsarǵan.
Dárigerler bul klınıkalyq jaǵdaıdyń ereksheligi ókpeni kezeń-kezeńimen segmentarlyq shaıý men keýde qýysyna vıbromassajdy qatar qoldanýda bolǵanyn atap ótti. Bul ádis alveolalarda jınalǵan aqýyzdy-lıpıdti massalardy tıimdi shyǵarýǵa múmkindik bergen.
Ókpeniń alveolıarlyq proteınozy – óte sırek kezdesetin dert. Ol shamamen 2 mıllıon adamnyń tek 1-2-eýinde ǵana kezdesedi.
Mamandardyń aıtýynsha, ókpeni tolyq shaıý qazirgi ýaqytta osy patologııany emdeýdiń negizgi ári eń tıimdi tásili sanalady.
Aıta keteıik, endi PІB aýrýhanasynda kúrdeli operatsııalar úlken tiliksiz jasalady.
