Qazaqstanda ókpeniń qaterli isigine shaldyǵý qaı óńirde joǵary
ALMATY. QazAqparat - Óndiristik kásiporyndar ornalasqan óńirlerde ókpe isigine shaldyǵý joǵary. Bul týraly «Qazaq onkologııa jáne radıologııa ǵylymı-zertteý ınstıtýty» AQ basqarma tóraıymynyń klınıkalyq jumys jónindegi orynbasary Nurlan Baltabekov «Ókpe qaterli isigi. Ozyq sheshimder» taqyrybynda ótip jatqan onlaın halyqaralyq konferentsııada aıtty, dep habarlaıdy QazAqparat tilshisi.
Onyń aıtýynsha, álem boıynsha jáne elimizde ókpe qaterli isiginen kóz jumatyndar sany joǵary.Oǵan qosa, ony erteń kezeńde dıagnostıkalaý deńgeıi óte tómen bolyp otyr.
«Qazaqstanda ókpe qaterli isigin birinshi satyda anyqtaý tek 6%-y qurap otyr. Eýropa elderinde de osy jaǵdaı, tek AQSh-ta tómen dozaly tomografııanyń arqasynda bul kórsetkish 17-20 paıyzǵa jetip otyr. Elimizde ókpe qaterli isigimen ásirese erkekter kóp aýyrady. Degenmen sońǵy 5-7 jylda áıelder arasynda aýyrshańdyq ósti, óıtkeni áıelder arasynda tekmeki shegý ádeti ulǵaıǵan»,-deıdi ol.
Ókpe ragyna tek temeki shegýmen ǵana emes, ónerkásiptik óndiris oryndarynyń da áseri bar eken. Elimiz boıynsha ókpe qaterli isigine shaldyǵý Soltústik Qazaqstan, Pavlodar, Shyǵys Qazaqstan, Qostanaı, Qaraǵandy oblystarynda óte joǵary.
«Qaraǵandy oblysynyń Temirtaý, Jezqazǵan, Balqash qalalarynda ókpe ragy joǵary bolyp tur. Al, óndiris oshaqtary az jáne erler men áıelder arasynda temeki shegý ádetke aınalmaǵan Túrkistan oblysynda bul aýrýdyń kórsetkishi óte tómen. Skrınıng jumystaryn júrgizgende osy kórsetkishterdi eskerý qajet, ıaǵnı óndiris oshaqtary bar óńirler birinshi kezekte nazarda bolý kerek. Sol kezde Qazaqstan boıynsha aýrýshańdyq birden tómendeıdi»,-deıdi Nurlan Baltabekov.
Qaterli isik aýrýyn zertteý jónindegi halyqaralyq agenttiktiń málimetinshe, jyl saıyn 2 mıllıonnan astam adam ókpe qaterli isigimen aýyrady, olardyń úshten ekisi – er adamdar.
Aıta keteıik, Almatyda «Qazaq onkologııa jáne radıologııa ǵylymı-zertteý ınstıtýty» AQ, «Qazaqstandyq onkologtar qaýymdastyǵy» QB-nyń uıymdastyrýymen ótip jatqan konferentsııaǵa Italııa, Túrkııa, Ispanııa, Reseı, Belorýssııa jáne Qazaqstannyń onkologııalyq ortalyqtardyń sarapshylary qatysyp jatyr.
