Qazaqstanda ókpe obyryn jasandy ıntellekt arqyly anyqtaý usynyldy
ASTANA. KAZINFORM — Quryltaı depýtaty Sergeı Ponomarev Qazaqstanda ókpe obyryn erte anyqtaý jáne skrınıngten ótkizý úshin otandyq jasandy ıntellekt júıesin iske qosýdy usyndy. Osy oraıda ol Úkimet basshysynyń atyna depýtattyq saýal joldady.
Depýtattyń aıtýynsha, Qazaqstandaǵy onkologııalyq aýrýlar arasynda ólim-jitim kórsetkishi boıynsha ókpe obyry birinshi orynda tur. Jyl saıyn úsh myńnan astam adamǵa osy dıagnoz qoıylady.
— Skrınıngtiń tıimdiligi dáleldengen. AQSh-ta mundaı tekserýler ólim-jitimdi 20%-ǵa, al Italııada 39%-ǵa azaıtty. Ókpe obyrynyń asqynǵan satysynda turǵan ár naýqasqa memleket 60 mln teńge jumsaıdy. Eń basty másele qarjyda emes, Qazaqstan halqynyń densaýlyǵynda», — dedi S. Ponomarev Quryltaıdyń jalpy otyrysynda.
Bul bastama aıasynda qaýip-qater tobyndaǵy adamdar úshin tómen dozaly kompıýterlik tomografııany qoldaný arqyly ókpe obyryn anyqtaýǵa baǵyttalǵan ulttyq skrınıngti engizý usynyldy.
Onyń sózine qaraǵanda, Qazaqstanda mundaı skrınıngti júrgizýge arnalǵan tehnologııalyq sheshim qazirdiń ózinde bar. 2023 jyly Dúnıejúzilik banktiń granty esebinen ókpe obyryn erte anyqtaýǵa jáne skrınıngten ótkizýge arnalǵan jasandy ıntellekt negizindegi júıe ázirlenip, ol tehnıkalyq turǵydan 200 medıtsınalyq mekememen biriktirilgen bolatyn. Alaıda joba ári qaraı damytylmady.
— Joǵaryda aıtylǵandardy eskere otyryp, tómen dozaly kompıýterlik tomografııany qoldaný arqyly ókpe obyryna skrınıng júrgizý jobasynyń toqtap turýyna sebep bolǵan jaıttar men faktorlardy anyqtaýdy, osy saladaǵy tehnologııalarǵa táýelsiz baǵalaý júrgizýdi, sondaı-aq jobany iske qosý merzimi men sharttaryn belgileýdi usynamyn», — dedi S. Ponomarev.
Aıta keteıik, bıyl tamyz aıynda Qazaqstanda ókpe obyryn tómen dozaly kompıýterlik tomografııa (TDKT) arqyly skrınıngten ótkizý bastalǵany habarlandy.
