Qazaqstanda ókpe obyryn erte anyqtaıtyn jańa skrınıng iske qosyldy
ALMATY. KAZINFORM – Qazaqstanda ókpe obyryn tómen dozaly kompıýterlik tomografııa (TDKT) arqyly skrınıngten ótkize bastady.
Jańa ádis isiktiń alǵashqy belgisi paıda bolǵanǵa deıin, kólemi nebári birneshe mıllımetr bolǵan kezde anyqtaýǵa múmkindik beredi. 10-15 tamyz aralyǵynda qaýip tobyna kiretin Qazaqstan turǵyndary elimizdiń barlyq óńirinde tekserýden tegin óte alady. Bul týraly Qazaq onkologııa jáne radıologııa ǵylymı-zertteý ınstıtýtynyń radıologııa jáne ıadrolyq medıtsına bóliminiń meńgerýshisi Jandos Amanqulov aıtty.
Onyń aıtýynsha, ókpe obyry - onkologııalyq aýrýdyń kóp taraǵan túrleriniń biri. Jyl saıyn osy dıagnozben 3,8 myńnan astam naýqas anyqtalyp, 2 myńdaı adam qaıtys bolady. Ókpe obyry uzaq ýaqyt boıy baıqalmaı, birtindep asqynýy múmkin. Adam ózin sap-saý sezingenimen, aýrýy ýaqyt ótken saıyn údeı beredi.
Jandos Amanqulov naýqastardyń kóbi dárigerge aýrýdyń III–IV satysynda bir-aq qaralatynyn aıtty. Onyń sózinshe, birinshi satyda sátti emdelý múmkindigi áldeqaıda joǵary bolady. Sondyqtan Qazaqstanda aýrýdy erterek anyqtaýǵa basymdyq berip otyr.
- Erte anyqtaıtyn negizgi ádistiń biri - tómen dozaly kompıýterlik tomografııa (TDKT). Kádimgi rentgennen aıyrmashylyǵy, kompıýterlik tomografııa ókpeniń qabat-qabat keskinin alyp, eń usaq ózgeristi de anyqtaıdy. TDKT kezinde dáriger qalyńdyǵy bir mıllımetrdeı bolatyn keskindi alyp, kólemi nebári eki-úsh mıllımetrlik oshaqtardy kóre alady. Ashqursaq júrip, aldyn ala taldaý tapsyryp, kúndelikti ishetin dárini toqtatýdyń qajeti joq. Túsirilimniń ózi 10–15 sekýndqa sozylady. Qujatty rásimdeýdi qosqanda shamamen 15 mınýt ýaqyt alady, - dedi ol.
2026 jyldyń 10–15 tamyz aralyǵynda Qazaqstannyń barlyq óńirinde ókpe obyry týraly aqparattandyrý aptalyǵy ótip jatyr. Aktsııa aıasynda TDKT kómegimen 1600-den astam adamdy tekserý josparlanǵan. Birinshi kezekte jasy 50-den asqan, qazirgi ýaqytta shylym shegetin nemese buryn shekken adamdar tegin tekserýden óte alady. Qaýip tobyna shań, tútin, hımııalyq jáne kantserogendi zattarmen turaqty baılanysta bolatyn zııandy óndiris jumysshylary da kiredi.
Almatyda tegin tekserý 10–14 tamyz aralyǵynda saǵat 11:00-den 13:00-ge deıin Almaty onkologııalyq ortalyǵynda, Ótepov kóshesi, 7 mekenjaıynda ótip jatyr. TDKT-dan ótý úshin 8 (7173) 123-952 telefony arqyly aldyn ala jazylý qajet.
Eske salaıyq, tegin onkologııalyq skrınıngte 1837 obyr jaǵdaıy rastaldy.
