Qazaqstanda ofshordan qarajat shyǵarý júıeli sıpattaǵy eń ótkir másele bolyp tabylady - T.Doskenov

ASTANA. QazAqparat - Sybaılas jemqorlyq jelisi arqyly ofshorlarǵa qarajattardyń turaqty aǵylýy Qazaqstandaǵy júıeli sıpatqa ıe eń ózekti máseleniń biri bolyp tabylady. Búgin Sybaılas jemqorlyqqa jáne kóleńkeli ekonomıkaǵa qarsy kúres jónindegi keńestiń birinshi otyrysynda QR Ulttyq kásipkerler palatasy áleýmettik sala jáne áriptestik komıtetiniń tóraǵasy Talǵat Doskenov osylaı málim etti.

«Eń mańyzdy ári eń ótkir júıeli sıpatqa ıe problemalardyń biri bizdiń ekonomıkadaǵy ofshorlaný máselesi bolyp otyr. Sondyqtan Memleket basshysynyń otandyq ınvestorlardy olardyń aktıvterin ekonomıkanyń naqty sektoryna salýǵa shaqyrýy meılinshe ózekti. Munyń máni mynada: ekonomıkanyń dollarǵa táýeldiliginen basqa, bizde bıznestegi ofshorlanýdyń aıtarlyqtaı salmaqty segmenti barshylyq. Árıne, buǵan sybaılas jemqorlyq shemasynyń battasatyny da aıqyn», - deıdi Talǵat Doskenov.

Onyń aıtýynsha, ofshorlaý degenniń ózi qarajatty elimizdiń ekonomıkasynan shyǵaryp, olardy sheteldik ıýrısdıktsııalarǵa ornalastyrýdy bildiredi. Bunyń ózi sot tóreliginiń múmkindikterin shekteıdi.

«Sol sebepti QR Prezıdenti kapıtaldy zańdastyrýdy jarııalady, al bul shara arqyly ınvestıtsııa retindegi resýrstar bizdiń ekonomıkaǵa oralýy shart. Bul sheneýnikter arasyndaǵy sybaılas jemqorlyqqa beıimdilikti tómendetý turǵysynan alǵanda da asa mańyzdy másele, óıtkeni para-qarajattar kóbinese ofshorlyq aımaqtarǵa «attanyp» jatatyny aıqyn», - dedi T.Doskenov.