Qazaqstanda nysandardy salý shyǵyndary azaıtylady
NUR-SULTAN. QazAqparat – Nysandar qurylysynda úlgilik jobalardy qoldaný kezinde jobalyq-smetalyq qujattamany ázirleý quny orta eseppen 55-65% paıyzǵa arzandaıdy. Bul týraly Úkimet otyrysynda QR Premer-Mınıstriniń orynbasary Jeńis Qasymbek aıtty, dep habarlaıdy QazAqparat tilshisi.
«Qazirgi ýaqytta Indýstrııa jáne ınfraqurylymdyq damý mınıstrligi ındýstrııalandyrýdyń 2-besjyldyǵyna taldaý júrgizýde. Ulttyq ekonomıka jáne Qarjy mınıstrlikterimen, ákimdiktermen jáne damý ınstıtýttarymen birlesip, ekonomıka sektorlaryna memlekettik qoldaýdyń usynylatyn sharalarynyń tıimdiligi, is-sharalar josparlarynyń iske asyrylý tıimdiligi máseleleri qarastyryldy. Taldaý nátıjeleri ázirlenip jatqan 2020-2025 jyldarǵa arnalǵan ındýstrıalandyrý baǵdarlamasynda eskeriletin bolady», - dedi ol.
Sonymen qatar Jeńis Qasymbek nysandardy salý shyǵyndaryn azaıtý jáne otandyq materıaldardy paıdalaný máselesine toqtaldy.
«Turǵyn úı, bilim berý, densaýlyq saqtaý, sý, sport jáne basqa da salalardaǵy nysandardy salýǵa 100-den astam modeldik joba ázirlendi. 2016-2018 jyldar aralyǵynda ákimdikter tıptik jobalar boıynsha 238 nysan turǵyzdy. Osy úlgilik jobalardy qoldaný kezinde jobalyq-smetalyq qujattamany ázirleý quny orta eseppen 55-65% - ǵa, al merzimi 5-6 aıǵa qysqarady. Bıýdjettik baǵdarlamalar ákimshileriniń úlgilik jobalardy mindetti túrde paıdalanýy bóliginde bıýdjettik zańnamaǵa túzetýler daıyndaldy», - dedi Jeńis Qasymbek.
