Qazaqstanda nysandar qurylysynyń qunyna baılanysty naqty lımıtter bekitildi
Mınıstrliktiń málimetinshe, komıtet nysandardyń qurylysynyń qunyna naqty lımıtterdi belgilegen. Aldaǵy ýaqytta óńirler boıynsha birdeı nysandar qurylysynyń quny da birdeı bolýy tıis. Ol úshin normatıvtik-tehnıkalyq qujattarǵa tıisti ózgerister engizilip, barlyq áleýmettik jáne azamattyq-turǵyn úı nysandarynyń qurylysyna shekti qundy (lımıtterdi) belgileý boıynsha Jol kartasy ázirlengen.
«Ekinshiden, baǵa qalyptastyrýdyń ashyqtyǵyn qamtamasyz etetin aqparattyq júıe ázirlendi. Baǵalaýdy qalyptastyrý tolyǵymen vedomstvolyq statıstıka negizinde júzege asyrylatyn bolady. Úshinshiden, zańnamaǵa úlgilik jobalardy mindetti qoldaný, jobalardyń biryńǵaı elektrondyq bankin qurý, sondaı-aq kvazımemlekettik sektor qarajaty esebinen birinshi jaýapkershilik deńgeıindegi nysandardyń saraptamasyn memlekettik saraptamaǵa berý bóliginde ózgerister engiziledi. Bul túzetýler bıznes-klımatty damytý máseleleri boıynsha zań jobasy aıasynda ázirlenip, Parlamenti Májilisine engizildi», - dep habarlaıdy mınıstrlikten.
Sondaı-aq jobalardy jobalaýmen jáne saraptaýmen aınalysatyn jeke jáne zańdy tulǵalarǵa qoıylatyn biliktilik talaptaryn qatańdatý josparlanyp otyr. Smeta jasýshylarǵa qoıylatyn biliktilik talaptarynyń tizbesine, onyń ishinde beıindi biliminiń bolýyna taldaý júrgiziledi.
«Jambyl, Soltústik Qazaqstan oblystary men Nur-Sultan qalasynda pılottyq jobalardy iske asyrý jumysy jalǵasýda. Bekitilgen Jol kartasyna sáıkes zańnamaǵa túzetýler ázirlendi. Memlekettik satyp alýdy josparlaý, qarjylandyrý, ótkizý júıesi salasyndaǵy túzetýlerdi osy jyldyń tamyzyna qaraı bekitý josparlanyp jatyr. Túzetýler engizý boıynsha jaýaptylar – Ulttyq ekonomıka jáne Qarjy mınıstrlikteri. Qurylys salasynda-qurylystyń bastapqy qunyn anyqtaý ádistemesi daıyndaldy. Tıisti ózgerister engizilgennen keıin ákimdikter pılottyq jobalardy iske asyra bastaıdy. Bıylǵy jyly qurylys salasynyń ashyqtyǵyn jáne tsıfrlandyrylýyn tolyq qamtamasyz etetin qurylys normalaryn tsıfrlandyrý jáne tsıfrlyq modeldeý tehnologııalaryn engizý boıynsha jumys bastaldy. 2020 jyly 36 normatıvtik-tehnıkalyq qujat, 2021-2023 jyldary – 195 qujat tsıfrlandyrylatyn bolady», - delingen habarlamada.
