Qazaqstanda NVIDIA tehnologııasynyń bazasynda eki sýperkompıýter klasteri iske qosyldy
ASTANA. KAZINFORM – Memleket basshysy NVIDIA kompanııasynyń vıtse-prezıdenti Rev Lebaredıanmen kezdesti, dep habarlaıdy Aqorda.
Kezdesýde jasandy ıntellekt, tsıfrlyq tehnologııalar jáne esepteý ınfraqurylymy salalaryndaǵy yntymaqtastyqty damytý perspektıvasy talqylandy.
Qasym-Jomart Toqaev jasandy ıntellektiniń jahandyq ekojúıesin qalyptastyrýda NVIDIA kompanııasynyń róli aıryqsha ekenin aıtty. Sonymen qatar jasandy ıntellektini Qazaqstan ekonomıkasynyń basym salalarynda qoldaný aıasyn keńeıtýdiń mańyzyn atap ótti.
Memleket basshysy men NVIDIA kompanııasynyń vıtse-prezıdenti ózara tıimdi yntymaqtastyqtyń berik negizi qalyptasqanyna nazar aýdardy. Atap aıtqanda, Qazaqstanda NVIDIA tehnologııasynyń bazasynda eki sýperkompıýter klasteri iske qosyldy.
Kezdesýde Ekibastuzda «Derekterdi óńdeý ortalyqtarynyń alqaby» jobasyn júzege asyrýǵa basa mán berildi. Joba qýattylyǵy shamamen 30 MVt bolatyn esepteý ınfraqurylymyn qalyptastyrýdy kózdeıdi. Keıin onyń kólemin 1 GVt-qa deıin arttyrý josparlanǵan.
Prezıdent osy bastamany tabysty júzege asyrý úshin NVIDIA jáne Firebird kompanııalarymen jasalǵan kelisimderdiń mańyzyna toqtaldy.
Rev Lebaredıan Qazaqstandaǵy jasandy ıntellekt ınfraqurylymynyń damý barysyn joǵary baǵalap, NVIDIA kompanııasynyń «Derekterdi óńdeý ortalyqtarynyń alqaby» jobasynyń kelesi kezeńine qatysýǵa nıetti ekenin jetkizdi.
Budan bólek, Qazaqstannyń kadrlyq áleýetin jáne tehnologııalyq ekojúıesin damytý máseleleri qarastyryldy.
Aıta keteıik, Toqaev Mıýnhende Alatau City megajobasyn tanystyrdy.
