Qazaqstanda «Nurly jer» aıasynda 100 myńǵa jýyq turǵyn úı paıdalanýǵa berildi
Memleket basshysynyń tapsyrmasyna sáıkes «Nurly jer» turǵyn úı baǵdarlamasy 15 jylda 1,5 mln otbasyn turǵyn úımen qamtamasyz etýge baǵyttalǵan. Baǵdarlama júzege asyrylǵan 2 jyldyń ishinde shamamen 200 myńǵa jýyq otbasy turmys jaǵdaıyn jaqsartýǵa múmkindik aldy.
«Nurly jer» turǵyn úı baǵdarlamasy 2016 jyldyń jeltoqsanynda qabyldandy. 2018 jyldyń maýsym aıynda ol memlekettik baǵdarlama bolyp qaıta bekitildi. Baǵdarlamanyń maqsaty - halyq úshin turǵyn úı qoljetimdiligin arttyrý. Memleket basshysy Qazaqstan halqyna arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty jyl saıynǵy Joldaýynda baǵdarlamaǵa oń baǵa berdi.
Indýstrııa jáne ınfraqurylymdyq damý mınıstrliginiń málimetinshe, 2017 jáne 2018 jyldyń 11 aıynda barlyq qarjylandyrý kózderinen 22 161 myń m² turǵyn úı paıdalanýǵa berilgen. Sonyń nátıjesinde 197 573 otbasy óz turǵyn úı jaǵdaılaryn jaqsartýǵa múmkindik alǵan. Onyń ishinde 2017 jyly - 11 168 myń m² (100 812 baspana), 2018 jyldyń 11 aıynda - 10 993 myń m² (96 761 baspana) berilgen.
2018 jyly jalpy 12,1 mln m² turǵyn úıdi (nemese 100 myńǵa jýyq baspana) paıdalanýǵa berý kerek bolatyn, onyń ishinde 1,3 mln m² turǵyn úıi - memlekettik ınvestıtsııalar esebinen. 2018 jyldyń 11 aıynda 11 mln m² paıdalanýǵa berildi, bul jyldyq jospardyń 91%-y. 96 731 baspana salyndy nemese jyldyq jospardyń 97%-y oryndaldy. Jyldyq jospardy 12 aıdyń qorytyndysy boıynsha tolyq kólemde oryndaý kózdelgen.
Memlekettik baǵdarlama bastalǵan 2 jyl ishinde qoldanysqa berilgen turǵyn úı kólemi boıynsha aldyńǵy qatarda Astana qalasy (4,7 mln m²), Almaty qalasy (2,6 mln m²), Mańǵystaý (1,8 mln m²), Aqtóbe (1,5 mln m²), Atyraý (1,3 mln m²), Almaty (1,3 mln m²) jáne Qyzylorda (1,2 mln m²) oblystary tur.
