Qazaqstanda notarıýs qyzmetteriniń quny qansha
ASTANA. KAZINFORM — QR Ádilet mınıstrligi 2026 jyldyń 1 qańtardan bastap notarıattyq áreketterdi jasaýǵa, qujattardyń kóshirmeleri men telnusqalaryn berýge, sondaı-aq notarıýstardyń keńes berý qyzmetterine jańa tarıf engizdi. Kazinform tilshisi senimhat, ósıet, jyljymaıtyn múlik nemese avtokólikti satyp alý-satý sharttaryn rásimdeý baǵasyn anyqtady.
Jańa tarıfter Qazaqstan Respýblıkasy Ádilet mınıstriniń 2025 jylǵy 27 qyrkúıektegi № 533 buıryǵymen bekitildi. Qujat Ádilet mınıstrliginde tirkelip, 2026 jyldyń 1 qańtarynan bastap qoldanysqa engizildi. Qujatqa sáıkes, jekeshe notarıýstyń qyzmetine aqy tóleý mólsheri aılyq eseptik kórsetkishpen (AEK) belgilenedi. 2026 jyly bir AEK 4 325 teńgeni boldy. Qyzmet quny notarıattyq árekettiń túrine, keıbir jaǵdaıda múliktiń qunyna, mámile jasalatyn jerge jáne onyń qatysýshylarynyń mártebesine baılanysty bolady.
Senimhat quny qansha
Kóp suranysqa ıe qyzmetterdiń biri — senimhat rásimdeý. 2026 jyly avtokólikti satýǵa quqyq bermeı, ony paıdalanýǵa jáne basqarýǵa arnalǵan senimhatty rásimdeý quny 2 AEK nemese 8 650 teńge boldy.
Múlikti paıdalanýǵa jáne oǵan bılik etýge arnalǵan senimhattyń quny 2,5 AEK, ıaǵnı 10 813 teńge.
Jeke tulǵalar úshin basqa senimhat túrleriniń tarıfi 1,1 AEK nemese 4 758 teńge boldy. Zańdy tulǵalar úshin bul tarıf 2,5 AEK nemese 10 813 teńge bolyp belgilengen.
Ósıet jáne muragerlik
Jekeshe notarıýs ósıetti kýálandyrǵany úshin 3 AEK, ıaǵnı 12 975 teńge alady.
Muraǵa quqyq týraly kýálikti berý quny 4 AEK nemese 17 300 teńge boldy.
Muragerlik múlikti qorǵaý sharalaryn qabyldaǵany úshin 8 AEK nemese 34 600 teńge alady.
Erli-zaıyptylardyń jáne múlki ortaq birlesken menshik quqyǵynda bolatyn basqa da tulǵalardyń ortaq múlkindegi úlesine menshik quqyǵy týraly kýáliktiń quny 5 AEK nemese 21 625 teńge bolady.
Avtokólik mámileleri
Avtokólikti ıelikten shyǵarý týraly shartty notarıattyq kýálandyrý quny mámileniń kimderdiń arasynda jasalatynyna baılanysty.
Eger avtokólik balalarǵa, jubaıyna, ata-anasyna, týǵan aǵa-inilerine nemese ápke-sińlilerine, sondaı-aq nemerelerine berilse, tarıf 4 AEK nemese 17 300 teńge bolady.
Basqa jeke tulǵalar arasyndaǵy mámileler úshin 10 AEK, ıaǵnı 43 250 teńge belgilengen.
Eger mámile taraptarynyń biri zańdy tulǵa bolsa, qyzmet quny 12 AEK nemese 51 900 teńge dep esepteledi.
Jyljymaıtyn múlikti rásimdeý quny qansha
Jyljymaıtyn múlikke qatysty mámileler úshin biryńǵaı soma belgilenbegen. Tarıf nysannyń qalalyq nemese aýyldyq jerde ornalasýyna, onyń qunyna jáne mámileniń kimderdiń arasynda jasalatynyna baılanysty ózgeredi.
Qalalyq jerde jyljymaıtyn múliktiń quny 30 AEK-ten aspasa, balalar, jubaıy, ata-anasy, týǵan aǵa-inileri nemese ápke-sińlileri, sondaı-aq nemereleri úshin tarıf 3 AEK nemese 12 975 teńgeni quraıdy.
Ózge tulǵalar úshin tarıf 8 AEK nemese 34 600 teńge bolady.
Eger nysannyń quny 30 AEK-ten assa, jaqyn týystar úshin tarıf 7 AEK nemese 30 275 teńge, al basqa tulǵalar úshin 12 AEK nemese 51 900 teńge bolyp belgilengen.
Jyljymaıtyn múlikti satyp alý kezinde mámileni rásimdeý úshin 4 AEK nemese 17 300 teńge mólsherinde tarıf belgilengen.
Eger mámile taraptarynyń biri zańdy tulǵa bolsa, 17 AEK nemese 73 525 teńge mólsherindegi tarıf qoldanylady.
Aýyldyq jerdegi tarıfter: jaqyn týystar úshin 1,5 AEK nemese 6 488 teńge, basqa tulǵalar úshin 2,7 AEK nemese 11 678 teńge, al taraptardyń biri zańdy tulǵa bolǵan jaǵdaıda 3 AEK nemese 12 975 teńge bolady.
Jalǵa alý, qaryz, neke sharty jáne basqa da kelisim
Bekitilgen tarıfter ózge de sharttarǵa qoldanylady.
Jaldaý, qaryz (ıpotekalyq turǵyn úı qaryzyn qospaǵanda), kepilaqy, lızıng, merdigerlik, neke sharty, ortaq menshiktegi múlikti bólý, muragerlik múlikti bólý, alıment tóleý týraly kelisim jáne quryltaı sharty úshin biryńǵaı 10 AEK, ıaǵnı 43 250 teńge mólsherinde tarıf qarastyrylǵan.
Kepilgerlik nemese kepildik shartyn kýálandyrý — 1,5 AEK nemese 6 488 teńge.
Ipotekalyq turǵyn úı qaryzy shartyn kýálandyrý úshin 4 AEK nemese 17 300 teńge alynady. Jyljymaıtyn múlik kepili shartyn kýálandyrýǵa da dál osy tarıf belgilengen.
Basqa kepil sharttaryn kýálandyrý úshin 10 AEK nemese 43 250 teńge mólsherindegi tarıf qoldanylady.
Qujattardyń kóshirmesi men qoltańbany kýálandyrý
Qujattardyń kóshirmesi jáne ózge de qujattarmen jumysta bólek tarıf belgilengen.
Jeke tulǵanyń qujaty nemese odan alynǵan úzindiniń kóshirmesiniń durystyǵyn kýálandyrý quny bir betke — 0,1 AEK nemese 433 teńge.
Zańdy tulǵa úshin bul qyzmettiń quny 0,17 AEK nemese shamamen 735 teńge bolady.
Qujattaǵy qoltańbanyń túpnusqalyǵyn nemese qujattyń bir tilden ekinshi tilge aýdarmasynyń durystyǵyn kýálandyrý jeke tulǵa úshin 0,53 AEK nemese shamamen 2 292 teńge boldy.
Notarıattyq kýálandyrylǵan qujattyń kóshirmesin berý quny 0,7 AEK nemese 3 028 teńge bolady.
Notarıattyq qujattyń telnusqasyn berý 3 AEK nemese 12 975 teńge boldy.
Notarıýs keńesiniń quny qansha
Keńes berý úshin 1 AEK, ıaǵnı 4 325 teńge mólsherinde tarıf belgilengen.
Qujattar men baǵaly qaǵazdardy saqtaý quny aıyna 0,6 AEK nemese 2 595 teńgeni boldy.
Demek 2026 jyly Qazaqstanda jekeshe notarıýs qyzmetteriniń quny jekelegen qujattarǵa qatysty birneshe júz teńgeden bastalyp, jyljymaıtyn múlik, avtokólik jáne basqa da mámilelerdi rásimdeý kezinde ondaǵan myń teńgege deıin jetedi.
Taǵy bir eskere keterlik jaıt, notarıattyq qyzmetterdiń barlyǵy birdeı belgilengen tarıf boıynsha kórsetiledi degendi bildirmeıdi. Naqty quny notarıattyq árekettiń túrine jáne oǵan qoıylatyn talaptarǵa baılanysty ózgeredi.
Aıta keteıik, ótken aptada Qazaqstandaǵy kólik saqtandyrý baǵasy týraly jazyldy.
