Qazaqstanda notarıýs qyzmetin kimder tegin paıdalana alady

Notarıattyq áreketter úshin aqy tóleýden kimder bosatylatynyn jáne kimderge 50 paıyzdyq jeńildik beriletinin Qaraǵandy oblystyq notarıattyq palatasy túsindirdi.

2026 jylǵy 1 qańtardan bastap Qazaqstanda Ádilet mınıstrligi bekitken jekeshe notarıýstar qyzmetiniń jańa tarıfteri kúshine endi. Notarıattyq qyzmetterdiń quny atqarylatyn árekettiń túrine qaraı belgilenedi. Máselen, ósıetti kýálandyrý úshin 3 AEK (12 975 teńge), muraǵa quqyq týraly kýálik alý úshin 4 AEK (17 300 teńge), al jeke tulǵaǵa qarapaıym senimhat rásimdeý úshin 1,1 AEK (4 758 teńge) tóleý qajet.

Jyljymaıtyn múlikke qatysty mámilelerdi kýálandyrý quny nysannyń baǵasyna, ornalasqan jerine jáne mámilege qatysýshylardyń týystyq dárejesine baılanysty ózgeredi. Sonymen qatar zańda notarıattyq qyzmetter aqysyn tóleýden tolyq nemese ishinara bosatylatyn azamattardyń sanattary naqty aıqyndalǵan.

«Notarıat týraly» Qazaqstan Respýblıkasy Zańynyń 30-babynyń 5-1-tarmaǵyna sáıkes azamattardyń tómendegi sanattary jekeshe notarıýstyń notarıattyq áreketteri men ózge de qyzmetteri úshin aqy tóleýden bosatylady.

Ardagerler men múgedektigi bar adamdar

Jeńildik Uly Otan soǵysynyń ardagerlerine, jeńildikter boıynsha olarǵa teńestirilgen ardagerlerge, basqa memleketterdiń aýmaǵyndaǵy urys qımyldarynyń ardagerlerine, sondaı-aq Uly Otan soǵysy jyldarynda tyldaǵy janqııarlyq eńbegi men minsiz áskerı qyzmeti úshin burynǵy KSRO-nyń ordenderi men medaldarymen marapattalǵan jekelegen azamattarǵa beriledi.

Buǵan qosa, 1941 jylǵy 22 maýsym men 1945 jylǵy 9 mamyr aralyǵynda keminde alty aı jumys istegen nemese áskerı qyzmet atqarǵan, biraq atalǵan ordender men medaldarǵa ıe bolmaǵan azamattar da osy sanatqa jatady.

Sondaı-aq múgedektigi bar adamdar, bala kezinen múgedektigi bar adamnyń ata-anasynyń biri jáne múgedektigi bar balanyń ata-anasynyń biri notarıattyq qyzmetter úshin aqy tóleýden tolyq bosatylady.

Kópbalaly analar

«Batyr ana» ataǵyn alǵan nemese «Altyn alqa», «Kúmis alqa» alqalarymen nagradtalǵan áıelder notarıattyq áreketterdiń barlyq túri úshin aqy tólemeıdi.

Arnaýly áleýmettik qyzmetter kórsetý ortalyqtarynda turatyn qart adamdar

Bul sanattaǵy azamattarǵa da notarıattyq áreketter úshin aqy tóleýden tolyq bosatý quqyǵy berilgen.

Qamqorshylyq belgilengen sozylmaly psıhıkalyq aýrýlary bar adamdar

Olarǵa muraǵa quqyq týraly kýálik berý kezinde jeńildik qarastyrylǵan.

Jasy boıynsha zeınetkerler

Zeınetkerler notarıattyq áreketterdiń basym bóligi úshin aqy tóleýden bosatylady. Alaıda bul jeńildik barlyq qyzmetke birdeı qoldanyla bermeıdi.

Atap aıtqanda, jeńildik mámilelerdi jáne sharýashylyq seriktestikterdiń quryltaı qujattaryn kýálandyrýǵa, murany senimgerlik basqarýshyny taǵaıyndaýǵa, muraǵa quqyq týraly kýálik berýge, sondaı-aq erli-zaıyptylardyń jáne ortaq menshiktegi ózge de adamdardyń múlkindegi úleske menshik quqyǵy týraly kýálik berýge qoldanylmaıdy.

Budan bólek, aqsha qarajatyn depozıtke qabyldaý, atqarýshylyq jazbalar jasaý, vekselderge narazylyq bildirý, qujattar men baǵaly qaǵazdardy saqtaýǵa qabyldaý da jeńildik qarastyrylmaǵan notarıattyq áreketter qataryna kiredi.

Qandastar

Qandastar Qazaqstan Respýblıkasynyń azamattyǵyn alýǵa baılanysty jasalatyn notarıattyq áreketter úshin aqy tóleýden bosatylady.

Kimderge 50 paıyzdyq jeńildik beriledi?

Azamattardyń keıbir sanattary notarıattyq qyzmetter úshin aqy tóleýden tolyq bosatylmaıdy. Alaıda olarǵa belgilengen tarıftiń jartysyn tóleý múmkindigi beriledi.

18 jasqa tolmaǵan jetim balalar men ata-anasynyń qamqorlyǵynsyz qalǵan balalarnotarıattyq qyzmetter qunynyń 50 paıyzyn tóleıdi.

«Qazaqstannyń múgedektigi bar adamdardyń erikti qoǵamy» odaǵy, Qazaq sańyraýlar qoǵamy, Qazaq soqyrlar qoǵamy jáne olardyń óndiristik kásiporyndary da notarıattyq qyzmetter úshin belgilengen tarıftiń 50 paıyzyn tóleıdi.

Jeńildikter zań talaptaryna sáıkes beriletinin eskergen jón. Olar azamattardyń naqty sanattaryna jáne notarıattyq áreketterdiń belgili bir túrlerine ǵana qoldanylady. Sondyqtan notarıýsqa júginbes buryn qajetti qyzmettiń aqy tóleýden bosatý nemese jeńildik qarastyrylǵan qyzmetter qataryna kiretinin anyqtap alǵan durys.

2026 jyly notarıýs qyzmeti qansha turady?

Notarıattyq qyzmetterdiń jańa tarıfteri Qazaqstan Respýblıkasy Ádilet mınıstriniń 2025 jylǵy 27 qyrkúıektegi № 533 buıryǵymen bekitilgen.

Buǵan deıin notarıýs qyzmetine tólenetin aqy memlekettik bajdan jáne quqyqtyq ári tehnıkalyq sıpattaǵy qyzmetterdiń qunynan turatyn. Al 2026 jylǵy 1 qańtardan bastap notarıattyq áreketterdi oryndaý, qujattardyń kóshirmeleri men telnusqalaryn berý, sondaı-aq jekeshe notarıýstardyń konsýltatsııalyq qyzmetteri úshin tólenetin aqy atalǵan buıryqqa sáıkes belgilenedi.

2026 jyly bir aılyq eseptik kórsetkish (AEK) 4 325 teńgege teń.

Eń jıi kórsetiletin notarıattyq qyzmetterdiń quny tómendegideı:

- Ósıetti kýálandyrý – 3 AEK (12 975 teńge);

- Muraǵa quqyq týraly kýálik berý – ár kýálik úshin 4 AEK (17 300 teńge);

- Avtomobıldi satý quqyǵynsyz paıdalanýǵa jáne basqarýǵa senimhat rásimdeý – 2 AEK (8 650 teńge);

- Múlikti paıdalanýǵa jáne oǵan bılik etýge senimhat rásimdeý – 2,5 AEK (10 813 teńge);

- Jeke tulǵalarǵa arnalǵan ózge de senimhattar – 1,1 AEK (4 758 teńge);

- Konsýltatsııa berý – 1 AEK (4 325 teńge);

- Qujat kóshirmesiniń túpnusqaǵa sáıkestigin kýálandyrý – jeke tulǵalar úshin ár betine 0,1 AEK (shamamen 433 teńge);

- Notarıattyq kýálandyrylǵan qujattyń kóshirmesin berý – 0,7 AEK (shamamen 3 028 teńge);

- Notarıattyq qujattyń telnusqasyn berý – 3 AEK (12 975 teńge).

Jyljymaıtyn múlikti rásimdeý quny qansha?

Jyljymaıtyn múlikke qatysty mámilelerdi kýálandyrý aqysy nysannyń qunyna, ornalasqan jerine jáne mámilege qatysýshylarǵa qaraı belgilenedi.

Qalada jyljymaıtyn múliktiń quny 30 AEK-ten aspasa, balalar, jubaıy, ata-anasy, týǵan aǵa-inileri men apa-sińlileri jáne nemereleri úshin tarıf 3 AEK (12 975 teńge) bolady. Al basqa tulǵalar úshin bul soma 8 AEK (34 600 teńge).

Eger jyljymaıtyn múliktiń quny 30 AEK-ten assa, jaqyn týystar úshin tarıf 7 AEK (30 275 teńge), al basqa tulǵalar úshin 12 AEK (51 900 teńge) bolyp belgilengen. Mámile taraptarynyń biri zańdy tulǵa bolsa, tarıf 17 AEK-ke (73 525 teńge) deıin jetedi.

Aýyldyq jerde notarıattyq qyzmetterdiń tarıfi tómenirek. Jaqyn týystar úshin ol 1,5 AEK (6 488 teńge), basqa tulǵalar úshin 2,7 AEK (11 678 teńge) bolady. Al mámile taraptarynyń biri zańdy tulǵa bolǵan jaǵdaıda 3 AEK (12 975 teńge) tóleý qajet.

Ipotekalyq turǵyn úı qaryzy qarajaty esebinen jyljymaıtyn múlik satyp alý kezinde tarıf 4 AEK (17 300 teńge) mólsherinde belgilengen.

Sharttardy notarıatta kýálandyrý qansha turady?

Jaldaý, qaryz (ıpotekalyq turǵyn úı qaryzynan basqa), kepilaqy, lızıng, merdigerlik, neke sharty, ortaq menshiktegi múlikti bólý, muragerlik múlikti bólý, alıment tóleý týraly kelisim jáne quryltaı sharttaryn kýálandyrý úshin 10 AEK (43 250 teńge) tóleý qajet.

Kepilgerlik nemese kepildik shartyn kýálandyrý quny – 1,5 AEK (6 488 teńge).

Ipotekalyq turǵyn úı qaryzy shartyn jáne osy qaryz boıynsha jyljymaıtyn múlik kepili shartyn kýálandyrý úshin 4 AEK (17 300 teńge) alynady. Kepildiń ózge túrlerine qatysty sharttardy kýálandyrý tarıfi 10 AEK (43 250 teńge).

Avtomobıldi ıelikten shyǵarý shartyn kýálandyrý kezinde jaqyn týystarǵa, ıaǵnı balalarǵa, jubaıyna, ata-anasyna, týǵan aǵa-inileri men apa-sińlilerine jáne nemerelerine arnalǵan tarıf 4 AEK (17 300 teńge) bolady.

Basqa tulǵalar úshin bul qyzmet quny 10 AEK (43 250 teńge). Al mámile taraptarynyń biri zańdy tulǵa bolǵan jaǵdaıda tarıf 12 AEK-ke (51 900 teńge) teń.

Osylaısha, notarıattyq qyzmetterdiń quny zańnamada belgilengen tarıfterge sáıkes esepteledi. Sonymen qatar azamattardyń jekelegen sanattary úshin notarıýs qyzmetin tegin paıdalaný nemese jeńildikpen alý múmkindigi qarastyrylǵan.

Jeńildik berýden bas tartylsa, qaıda júginýge bolady?

Eger azamat zań boıynsha notarıattyq qyzmet aqysyn tóleýden bosatylýǵa nemese jeńildik alýǵa quqyly bola tura, notarıýs oǵan jeńildik berýden bas tartsa, Qaraǵandy oblystyq notarıattyq palatasyna nemese Qaraǵandy oblysynyń Ádilet departamentine shaǵymdana alady.

Shaǵymdanar aldynda jeńildik alýǵa quqyǵyn rastaıtyn qujattardy daıyndap, notarıýstyń bas tartýyna ne sebep bolǵanyn naqtylap alǵan jón.

Buǵan deıin QR Ádilet mınıstrligi 2026 jyldyń 1 qańtardan bastap notarıattyq áreketterdi jasaýǵa, qujattardyń kóshirmeleri men telnusqalaryn berýge, sondaı-aq notarıýstardyń keńes berý qyzmetterine jańa tarıf engizgeni týraly habarlaǵan bolatynbyz.