Qazaqstanda normatıvtik quqyqtyq aktilerge saraptama júrgiziledi

NUR-SULTAN. QazAqparat - Endigi ýaqytta elimizdegi normatıvtik quqyqtyq aktilerge sybaılas jemqorlyqtyń aldyn alý maqsatynda analıtıkalyq saraptama júrgiziledi. Ol úshin arnaıy sarapshylar pýly quryldy, dep habarlaıdy QazAqparat tilshisi.

«Memleket basshysy «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynda normatıvtik quqyqtyq aktilerge sybaılas jemqorlyqqa qarsy taldaý júrgizý qajettigine nazar aýdardy. Búginde normatıvtik quqyqtyq aktiler salasyna taldaý júrgizý qajettigi týyndap otyr. Osy oraıda atalǵan salada sybaılas jemqorlyqtyń aldyn alý jáne boldyrmaý maqsatynda 4 kezeńnen turatyn sarapshylar baıqaýyn ótkizdik. Alǵashqy kezeńde 211 adam sarapshy retinde qatysýǵa ıaǵnı sybaılas jemqorlyq deńgeıin tómendetýge óz úlesin qosýǵa nıet bildirdi. Onyń ishinde 7 ótinim qujat sáıkessizdigine jáne 5 ótinim sarapshylar talabyna saı kelmegendikten keri qaıtaryldy. Nátıjesinde testileý kezeńine 199 úmitker jiberildi», - dedi QR Sybaılas jemqorlyqqa qarsy kúres agenttigi parasat departamenti dırektorynyń orynbasary Nursultan Bekınov onlaın baspasóz máslıhatynda.

Onyń aıtýynsha, testileý synaǵy qatań túrde, ıaǵnı avtomattandyrylǵan proktorıng júıesinde ótkizildi.

«Testileýge 15 úmitker qatysqan joq. Osylaısha, synaqtan ótken 184 úmitkerdiń 98-i jetkilikti ball jınady. Sondaı-aq, sarashylardy konkýrstyq irikteýdiń sońǵy áńgimelesý kezeńi Zoom-konferentsııa arqyly ótti. Áńgimelesý qorytyndysy boıynsha 97 úmitkerdiń ishinde ekeýi jetkilikti ball jınaı almady, bireýi áńgimelesýge kelgen joq. Baıqaýdy qorytyndylaý nátıjesinde agenttik sarapshylar tizilimin bekitti, onyń quramynda 93 sarapshy bar», - dedi ol.