Qazaqstanda Nıpah vırýsyn juqtyrý jaǵdaılary tirkelgeni ras pa
ASTANA. KAZINFORM – Qazaqstanda Nıpah vırýsyn juqtyrý, sondaı-aq ony el aýmaǵyna ákelý jaǵdaılary tirkelgen joq. Qazirgi ýaqytta elimizdegi epıdemıologııalyq jaǵdaı turaqty jáne tolyq baqylaýda.
Profılaktıka maqsatynda jáne Úndistandaǵy Nıpah vırýsyna baılanysty epıdemıologııalyq ahýalǵa oraı QR Densaýlyq saqtaý mınıstrligi memlekettik shekara arqyly barlyq ótkizý pýnkterinde sanıtarııalyq-karantındik baqylaýdy kúsheıtti.
Vedomstvo málimetinshe, Úndistannan, sondaı-aq aýrý tirkelgen Ońtústik-Shyǵys Azııanyń ózge de elderinen kelgen adamdarǵa erekshe nazar aýdarylady. Osy ınfektsııa boıynsha qolaısyz elderdiń tizbesi turaqty túrde qaıta qaralyp, jańartylyp otyrady.
- Medıtsınalyq uıymdar ınfektsııanyń el aýmaǵyna ákelinýi múmkin degen qaýipke baılanysty daıyndyqqa keltirildi. Shuǵyl medıtsınalyq kómek pen ınfektsııalyq statsıonarlar brıgadalarynyń daıyndyǵy qamtamasyz etildi, dárilik zattardyń, jeke qorǵaný quraldarynyń jáne dezınfektsııalaý quraldarynyń azaıtylmaıtyn qory qalyptastyryldy.
Infektsııanyń taralýynyń aldyn alý maqsatynda endemııalyq elderge sapar shegýdi josparlap otyrǵan azamattarǵa jeke profılaktıka sharalaryn saqtaý usynylady. Sondaı-aq shetelden oralǵannan keıin aýrý belgileri baıqalǵan jaǵdaıda barǵan eli týraly aqparatty kórsete otyryp, dereý medıtsınalyq kómekke júginý qajet, - dep eskertti mınıstrlikten.
Aıta keteıik, Nıpah vırýsy zoonozdyq ınfektsııalarǵa jatady jáne adamdarǵa janýarlardan, onyń ishinde jarqanattar men shoshqalardan, sondaı-aq juqtyrǵan adammen tyǵyz qarym-qatynas kezinde juǵýy múmkin. Vırýs lastanǵan taǵamdar men sýsyndar arqyly da beriledi.
Aýrý joǵary temperatýramen, bas aýrýymen, jalpy álsizdikpen sıpattalady. Aýyr jaǵdaılarda ortalyq júıke júıesi zaqymdalyp, pnevmonııa damýy yqtımal.
Qazirgi ýaqytta Nıpah vırýsyna qarsy arnaıy emdeý tásili men maquldanǵan vaktsına joq, medıtsınalyq kómek sımptomatıkalyq sıpatta kórsetiledi.
Eske salaıyq, buǵan deıin Úndistanda ólimge ákeletin Nıpah vırýsy órship turǵany habarlanǵan bolatyn.