Qazaqstanda nevrologııalyq aýrýlardyń ulttyq tirkelimi qurylýy múmkin
ASTANA. KAZINFORM - Qazaqstan nevrologııalyq aýrýlary bar patsıentterge dıagnostıka, emdeý jáne kútim kórsetýge qoljetimdilikti jaqsartýǵa, olardyń ómir súrý sapasyn arttyrýǵa jáne ómir boıy mı saýlyǵyn nyǵaıtýǵa baǵyttalǵan Dúnıejúzilik densaýlyq saqtaý uıymynyń (DDU) sektoraralyq jahandyq is-qımyl josparyn iske asyrýǵa qosylady.
Bul bastamanyń ózektiligi nevrologııalyq aýrýlardyń taralý deńgeıiniń artýymen baılanysty.
Qazaqstanda Parkınson aýrýyna shaldyqqan patsıentter sanynyń ósýi baıqalady. Sonymen qatar ınsýlt, dementsııa, epılepsııa, bas aýrýlary jáne dıabettik neıropatııa nevrologııalyq múgedektiktiń negizgi sebepteriniń qatarynda qalyp otyr.
2026 jylǵy 9–10 maýsymda Astanada Dúnıejúzilik densaýlyq saqtaý uıymy Qazaqstan Respýblıkasy Densaýlyq saqtaý mınıstrligimen birlesip «Nevrologııalyq jaǵdaılar – qoǵamdyq densaýlyq saqtaýdyń basymdyǵy: epılepsııa jáne basqa da nevrologııalyq buzylystar jónindegi DDU-nyń 2022–2031 jyldarǵa arnalǵan sektoraralyq jahandyq is-qımyl josparyn engizýdi jedeldetý» atty ulttyq semınar ótkizip jatyr.
Semınar barysynda memlekettik organdardyń, medıtsınalyq qaýymdastyqtyń, halyqaralyq uıymdardyń jáne patsıenttik birlestikterdiń ókilderi nevrologııalyq aýrýlary bar patsıentterge kómek kórsetý júıesin jetildirý sharalaryn talqylaıdy.
Qarjylandyrý máselelerine, kadrlardy daıarlaýǵa, qyzmetterdi mindetti áleýmettik medıtsınalyq saqtandyrý júıesine ıntegratsııalaýǵa, aqparattyq júıelerdi damytýǵa jáne nevrologııalyq aýrýlardyń ulttyq tirkelimin qurýǵa erekshe nazar aýdarylady.
Іs-shara qorytyndysy boıynsha Qazaqstanda DDU-nyń Jahandyq is-qımyl josparyn iske asyrý jónindegi ulttyq jol kartasyna usynystar ázirlenip, sektoraralyq ózara is-qımyldyń aldaǵy qadamdary aıqyndalady.
Semınardy ótkizý óńirdiń densaýlyq saqtaý júıelerin nyǵaıtýǵa baǵyttalǵan Ortalyq Azııadaǵy densaýlyq pen ál-aýqatty qoldaý jónindegi jol kartasynyń maqsattaryna da sáıkes keledi.
Osyǵan deıin Qazaqstanda densaýlyq saqtaý júıesin tsıfrlandyrý kúsheıtiletini týraly jazdyq.
