Qazaqstanda nesıeniń eń joǵary somasyna shekteý engizilmek
Qazaqstanda tutyný nesıesiniń eń joǵary somasyna shekteý qoıylmaq. Bul týraly Májiliste «Halyqtyń shamadan tys kredıt alýyn azaıtý jáne qarjy saýattylyǵyn arttyrý» taqyrybyndaǵy Parlament tyńdaýynda Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty, dep habarlaıdy Kazinform.
«Qazir qomaqty somada tutyný nesıesin qarqyndy túrde berý úrdisi baıqalyp otyr. Birinshiden, tutyný nesıesiniń ósýine halyq suranysynyń artýy da áser etip otyr. Bul turǵyda taýarlarǵa qaryzdy bólip tóleýge suranys kóbeıgen, sondaı-aq tutyný nesıelerin kásipkerlik maqsatta paıdalaný da artqan. Osynyń saldarynan kepilsiz tutyný nesıeleri boıynsha ortasha qaryz jyl basyndaǵy 913 myń teńgeden qazir 1 mıllıon teńgege deıin jetti», – dedi M. Ábilqasymova.
Onyń sózine qaraǵanda, 5 mln teńgeden asatyn kepilsiz tutyný nesıeleriniń úlesi qazirdiń ózinde 12 paıyzdy qurasa, al qaryz alýshylardyń sany boıynsha 3 paıyz deńgeıinde.
«Bul turǵyda tutyný nesıesiniń shamadan tys ósýin shekteý aıasyndaǵy qosymsha shara retinde agenttik zańnamalyq deńgeıde osy nesıeniń somasyna shekteý engizýdi usynyp otyr», – dedi apgenttik basshysy.
Budan buryn habarlanǵandaı, bıyl Memleket basshysy Qasym-Jomart Toqaev Qazaqstan halqyna Joldaýy kezinde bankter tutyný nesıesimen áýestenip ketkenin aıtqan edi.
