Qazaqstanda nesıe berýdiń jańa erejeleri qashan engiziledi

ALMATY. KAZINFORM – QR Qarjy naryǵyn retteý jáne damytý agenttiginiń tóraǵasy Mádına Ábilqasymova tutynýshylyq nesıeler úshin jyldyq tıimdi syıaqy mólsherlemesi qashan jáne qandaı mólsherde belgileýdi josparlap otyrǵanyn aıtty.

Agenttik basshysy 19 maýsym kúni Memleket basshysy «Qazaqstan Respýblıkasynyń keıbir zańnamalyq aktilerine kredıt berý kezinde táýekelderdi barynsha azaıtý, qaryz alýshylardyń quqyqtaryn qorǵaý, qarjy naryǵyn retteýdi jáne atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» Zańǵa qol qoıǵanyn atap ótti. 

«Zań qabyldanǵannan keıin zańǵa táýeldi normatıvtik quqyqtyq aktilerdi eki aı ishinde ázirlep úlgerýimiz kerek. Qazir Ulttyq bankpen birlesip jyldyq tıimdi syıaqy mólsherlemesi boıynsha túzetýlerdi rettep jatyrmyz, aldaǵy eki aptada tolyq aıaqtaımyz dep josparlap otyrmyz. Paıyzdyq mólsherleme bankter men mıkroqarjy uıymdary úshin eki túrli bolýy múmkin. Agenttikke onlaın nesıe beretin uıymdar óz táýekelderin aıtyp, paıyzdyń joǵary bolǵanyn surap otyr», - deıdi ol.

QR Qarjy naryǵyn retteý jáne damytý agenttiginiń tóraǵasy Mádına Ábilqasymovanyń sózinshe, eki aptadan keıin kredıtterdiń jyldyq tıimdi syıaqy mólsherlemesi belgili bolady. Aıtýynsha, qazirgideı 56 paıyz emes, jańa jyldyq tıimdi syıaqy mólsherlemesi 44 protsent bolýy múmkin. 

Bankterdiń kepilsiz beretin tutynýshylyq nesıe somasy da ózgerýi múmkin. ıAǵnı, kredıt kólemi - 8 mıllıon 122 myń teńgeden aspaýy yqtımal. Al shaǵyn kredıttik uıymdar úshin qaryzdyń shegi - 4 mıllıon 61 myń teńgeden kóp bolmaýy tıis. Bul jyl saıyn ózgeretin aılyq eseptik kórsetkishke tikeleı baılanysty.