Qazaqstanda nesıe berý tártibi qatańdatylady
Qarjy naryǵyn retteý jáne damytý agenttigi bank jáne mıkroqarjylyq qyzmetke qatysty normatıvtik quqyqtyq aktilerge ózgerister engizip jatyr, dep habarlaıdy Kazinform.
Bul sharalar nesıe alýshylardyń quqyqtaryn qorǵaýǵa, alaıaqtyqqa qarsy turýǵa jáne bankter men mıkroqarjy uıymdarynyń (MQU) jaýapkershiligin kúsheıtýge baǵyttalǵan.
Tutynýshylyq nesıeler men mıkrokredıtterge shekteýler engiziledi
Onlaın nesıe alǵannan keıin – 24 saǵat oılanyp kórýge múmkindik
Internet arqyly rásimdelgen, somasy 150 aılyq eseptik kórsetkishten (AEK) (589 800 teńgeden) asatyn kepilsiz tutynýshylyq banktik nesıeler úshin qarajatty aýdarýǵa kidiris engiziledi.
Bank qarajatty zaemshy kelisimshartqa qol qoıǵan soń, keminde 24 saǵat ótkennen keıin jáne tek qaryz alýshynyń kelisimimen ǵana aýdara alady. Bul kelisimdi elektrondyq úkimet portaly arqyly da rastaýǵa bolady.
Kúnine birneshe mıkrokredıt alǵandarǵa – kidirtý kezeńi
Eger azamat bir kúnde birneshe mıkrokredıt alyp, olardyń jalpy somasy 150 AEK-ten assa, bank nemese MQU kelesi qaryzdy berýdi kidirtý nemese keıinge qaldyrý tártibin engizýge mindetti bolady.
150 AEK-ten joǵary nesıe — tek jeke barǵanda beriledi
Eger azamat alǵash ret 150 AEK nemese odan joǵary somaǵa nesıe nemese mıkrokredıt rásimdegisi kelse, kelisimshartty bank ne MQU bólimshesine jeke ózi baryp qana jasaı alady.
Jas jáne egde jastaǵy azamattarǵa – erekshe tártip
21 jasqa tolmaǵan jáne 55 jastan asqan azamattarǵa tutynýshylyq nesıe nemese mıkrokredıt berý úshin bank pen MQU olardyń kelisimin naqty jáne ashyq túrde alǵannan keıin ǵana rásimdeı alady.
Banktik jáne mıkroqarjylyq ombýdsmenge – memlekettik tildi bilý talaby
Joba aıasynda banktik jáne mıkroqarjylyq ombýdsmen laýazymyna úmitkerlerge jańa talap engizilmek. Bul laýazymda jumys isteý úshin úmitker KAZTEST júıesi boıynsha memlekettik tildi V2 deńgeıinen tómen emes deńgeıde meńgergenin rastaýy tıis. Bul qaryz alýshylarmen tolyqqandy qarym-qatynas jasaýǵa múmkindik beredi.
Jańa erejeler ne úshin qajet?
Túsindirme jazbada kórsetilgendeı, bul ózgerister:
Nesıe alaıaqtyǵynyń aldyn alý;
Bank pen MQU-lardyń jaýapkershiligin arttyrý;
Onlaın nesıeler men mıkrokredıtter rásimdegende qaryz alýshylardyń quqyqtaryn qorǵaý maqsatynda ázirlengen.
Eske salsaq, buǵan deıin elimizde sarbazdarǵa kredıt berýge tyıym salý mehanızmi ázirlengeni týraly jazǵan edik.