Qazaqstanda nesıe berý sharttary jaqsardy - Mádına Ábilqasymova
«Ulttyq bank qyzmetiniń basym baǵyty – ekonomıkany nesıeleý deńgeıin ósirý. Bankterdiń nesıe belsendiligi birtindep qalpyna kele bastady. Bıyl sáýir-qyrkúıek aralyǵynda bank sektorynyń kredıttik portfeli 7,4 paıyzǵa nemese 921,8 mlrd teńgege ósip, jalpy 13,4 trln teńgege deıin ósti. Zańdy tulǵalarǵa kredıt kólemi osy jyldyń І toqsanynda bıznestiń jumys istemeıtin nesıelerin esepten shyǵarýyna baılanysty 8,1 paıyzǵa azaıyp, 7,2 trln teńge kóleminde qaldy», - dedi Mádına Ábilqasymova Parlament Senatynyń Qarjy jáne bıýdjet komıtetiniń otyrysyndaǵy «2020-2022 jyldarǵa arnalǵan respýblıkalyq bıýdjet týraly» zań jobasynyń tanystyrylymynda.
Ulttyq bank tóraǵasy orynbasarynyń aıtýynsha, Qazaqstanda nesıe berý sharttary jaqsarǵan. Teńgemen beriletin bızneske arnalǵan nesıeler boıynsha syıaqy mólsherlemesi ótken jyldyń qyrkúıegindegi 12,2 paıyzdan búginde 11,7 paıyzǵa tómendegen.
«Qazir bank júıesinde keshendi túrde bank aktıvteriniń sapasyn táýelsiz baǵalaý jumysy jalǵasyp keledi. Aktıvterdiń sapasyn baǵalaýdy osy jyldyń jeltoqsanynda aıaqtaý josparlanyp otyr. 2020 jyldyń aqpanynda banktermen túzetý is-qımyldarynyń jeke josparlaryn talqylap, bekitemiz. Ótkiziletin is-sharalardyń nátıjesinde bank júıesiniń ashyqtyǵyn arttyryp, nyǵaıtý kózdelgen. Bul qadam bankterdiń ekonomıkany nesıeleý kólemin arttyrýǵa múmkindik beredi», - dedi ol.
Mádına Ábilqasymova ekonomıkany nesıeleý úshin bankterdi uzaq merzimdi teńgemen qorlandyrý úshin 600 mlrd teńgege «Jeńildikti nesıeleý baǵdarlamasy» iske asyrylǵanyn atap ótti. Onyń aıtýynsha, bıyl 18 qazanǵa deıin bankterde 263,8 mlrd teńge somaǵa 368 joba qaralyp jatyr. Qazirge deıin 46,6 mlrd teńgeniń 127 nesıesi berilip qoıǵan.
