Qazaqstanda nesıe alýdyń jańa erejesi engizildi

ASTANA. KAZINFORM — Qazaqstanda iri somadaǵy nesıege ótinish jazǵannan keıin, qaryz alýshyǵa taǵy bir oılanýǵa qosymsha ýaqyt beriledi. Bul týraly Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty. 

Atap aıtqanda, nesıe týraly shartqa qol qoıǵannan keıin, bank belgili bir ýaqyt aralyǵynda klıentke qarajatty aýdarmaıdy. Bul turǵyda qaryz alýshyǵa taǵy da oılanýǵa múmkindik beriledi, ıaǵnı osy ýaqyt aralyǵynda ol nesıeden bas tarta alady.

Agenttik basshysynyń aıtýynsha, eger nesıe somasy 1 mln teńgeden assa, qaryz alýshyǵa 24 saǵatqa qosymsha ýaqyt beriledi. Osy ýaqyt aralyǵynda klıentter alaıaqtardyń qurbany bolmas úshin tıisti tekseris jasalady.

— Sonymen qatar qaryz alýshy alaıaqtardyń yqpalynda bolsa, esin jıyp, bárin oılanyp, nesıe alýdan bas tartýǵa múmkindigi bar. Nesıe mıllıon teńgeden asqan jaǵdaıda, 24 saǵattyq merzim beriledi. Budan bólek, 150-den 250 AEK-ke deıingi (600 myń teńgeden 1 mln teńgege deıin) nesıege 8 saǵattyq ýaqyt belgilendi. Buǵan deıin osyndaı nesıeni birneshe mınýtta alýǵa múmkin bolatyn, — dedi Mádına Ábilqasymova.

Buǵan deıin habarlanǵandaı, elimizde jarty mln adamnyń bankterde problemaly nesıesi bar.