Qazaqstanda nemis kapıtaly bar 1400-den astam kompanııa tirkelgen - Prezıdent
ASTANA. KAZINFORM – Qasym-Jomart Toqaev pen Frank-Valter Shtaınmaıer keńeıtilgen quramda kelissóz júrgizdi, dep habarlaıdy Aqorda.
Memleket basshysy Germanııaǵa shaqyrǵany úshin Federaldyq Prezıdent Frank-Valter Shtaınmaıerge alǵys aıtyp, joǵary deńgeıdegi qarqyndy baılanys ekijaqty áriptestiktiń strategııalyq jáne jan-jaqty sıpat alǵanyn aıqyndaıtynyn jetkizdi.
Qasym-Jomart Toqaev Germanııa Qazaqstannyń Eýropadaǵy negizgi seriktesi ekenine nazar aýdardy. Elderimizdi berik dostyq pen ózara senim baılanystyrady. Sondaı-aq yntymaqtastyqty damytýǵa mol áleýet bar.
– Búginde aýqymdy baǵytty qamtyǵan qarym-qatynasymyz senimdi túrde damyp keledi. Oǵan úkimetterimiz ben eki el iskerlik toptarynyń dáıekti baılanysymen bekı túsken joǵary deńgeıdegi belsendi saıası dıalog aıtarlyqtaı yqpal etip otyr. Saparymnyń qarsańynda Berlınde Úkimetaralyq jumys tobynyń otyrysy men Strategııalyq yntymaqtastyq jónindegi Qazaqstan-Germanııa iskerlik keńesiniń ótýi qos taraptyń ózara tıimdi seriktestikti jandandyrýǵa yntaly ekenin kórsetti, – dedi Qasym-Jomart Toqaev.
Memleket basshysy saýda-ekonomıkalyq jáne ınvestıtsııalyq baılanys qarqyndy damyp kele jatqanyna nazar aýdardy.
– 2025 jyly ekijaqty taýar aınalymy 4,5 mıllıard dollarǵa jetti. Bıyl da oń qarqyn saqtalyp otyr. Jyl basynan bergi 7 aıda ózara saýdanyń kólemi 2,6 mıllıard dollardan asty. Qazaqstanda nemis kapıtaly bar 1400-den astam kompanııa tirkelgen. Jıyrma jyl ishinde Germanııadan tartylǵan ınvestıtsııanyń jalpy kólemi 8 mıllıard dollardy qurady. Germanııanyń CLAAS Group, Rhenus Logistics, Siemens Energy, Linde sekildi jetekshi kompanııalarymen baılanys – yqpaldastyǵymyzdyń jarqyn úlgisi, – dedi Qazaqstan Prezıdenti.
Kelissóz barysynda eki eldiń mádenı-gýmanıtarlyq yntymaqtastyǵyn nyǵaıtý máselesine aıryqsha mán berildi.
Atap aıtqanda, memleketter basshylary bilim, medıtsına jáne mádenıet salalaryndaǵy yqpaldastyqty odan ári jandandyrýǵa beıil ekenin rastady.
Aıta keteıik, Qazaqstan men GFR prezıdentteri shaǵyn quramda kelissóz júrgizdi.
