Qazaqstanda nemis tiliniń jańartylǵan mazmundaǵy oqý baǵdarlamasy ázirlenbek

ASTANA. QazAqparat - Qazaqstandaǵy orta mektepterde nemis tilin oqytýdyń jańartylǵan mazmunynyń tıptik oqý baǵdarlamasy ázirlenýi yqtımal. Bul týraly «Qazaqstandyq «Vozrojdenıe» nemister birlestigi» qoǵamdyq qorynda ótken qamqorshylyq keńestiń keńeıtilgen otyrysynda QR Parlamenti Májilisiniń depýtaty Albert Raý málim etti, dep habarlaıdy QazAqparat tilshisi.

«Jaqynda ǵana ózderińiz biletindeı, nemis tilin mektepterde oqytý máselesine qatysty dóńgelek ústel ótken bolatyn. Ol jıynda naqty usynystar ázirlengen. Qamqorshylyq keńes ázirlegen usynystardy Qazaqstan Respýblıkasynyń Bilim jáne ǵylym mınıstri Erlan Saǵadıevke joldadyq. Ol usynystardyń ishinde orta mektepterde nemis tilin oqytýdyń jańartylǵan mazmunynyń tıptik oqý baǵdarlamasyn qurý, oqýlyqtar men oqý-ádistemelik keshender, qosymsha ádebıetter týraly jazylǵan. Sonymen qatar, ol usynystardyń ishinde muǵalimderdi (nemis tilinen - avt.) qaıta daıarlaý máselesi de qamtylǵan. Biz osy máseleni Bilim jáne ǵylym mınıstrliginiń aldyna qoıyp otyrmyz», - dedi basqosýda májilismen, «Qazaqstandyq «Vozrojdenıe» nemister birlestigi» qoǵamdyq qory Qamqorshylyq keńesiniń tóraǵasy Albert Raý.

Depýtat osy jyldyń aıaǵyna deıin tildik konferentsııa ótkiziletinin, ol jıynda tek osy máselelerdi talqylap qana qoımaı, naqty is-áreketterdiń kesheni sóz bolatynyn atap ótti.