Qazaqstanda nege veıppen birge temekige de tyıym salynbaıdy - depýtat jaýaby

ASTANA. KAZINFORM – Osydan birer kún buryn Májilis veıpke tyıym salatyn zańdy qabyldady. Al temekige nelikten tyıym salynbaıdy? Bul suraqqa Parlament Májilisiniń depýtaty Nurgúl Taý men Densaýlyq saqtaý mınıstrligi medıtsınalyq kómek uıymy dırektorynyń orynbasary Gúlnar Sársenbaeva Jibek Joly telearnasynda «Fokýs vnımanııa» baǵdarlamasynda jaýap berdi.

Gúlnar Sársenbaevanyń aıtýynsha, sarapshylar temekiniń quramyn zerttep, onyń saldaryn anyqtaǵan.

Alaıda, veıptiń quramy týraly áli naqty aqparat joq. Onyń quramynda nıkotın, glıtserın jáne propılenglıkoldiń bary belgili.

«Veıp aýdıtorııasy balalar men jasóspirimderge baǵyttalǵan. Eresek adamdar temekiniń zııany men saldaryn biledi. ıAǵnı temeki shegý nemese tastaýdy ózi sheshedi. Al tolyq qalyptaspaǵan balalar men jasóspirimderdi marketıng ındýstrııasy túrli-tústi qaptamamen qyzyqtyryp, tartyp otyr. Búginde táttilerdiń, kofeniń taǵy basqa hosh ıistiń 16 myń túri bar. Eger jasóspirim temeki shegetin bolsa, ata-anasy ıis arqyly anyqtap, shara qoldana alady. Al qazir ata-ana ajyrata almaıdy, óıtkeni veıptiń ıisi de, dámi de joq», - dedi Gúlnar Sársenbaeva telebaǵdarlama efırinde.

Sondaı-aq, spıker temekiniń de, vaıptiń de quramynda nıkotın bar ekenin atap ótti. Ol táýeldilik týǵyzady, balalardyń mıynyń damýyn toqtatady.

Ony qoldanatyn bala oqý baǵdarlamasyn baısaldy qabyldaı almaıdy jáne minez-qulqyn durys basqarmaıdy.

Óz kezeginde Májilis depýtaty Nurgúl Taý balalar men jasóspirimderdi ýlap jatqan veıp Qytaıdan jetkiziletinin aıtty.

«Bizdiń naryq tek Qytaıdan kelgen ónimderge toly. Men veıptiń quramyn zerthana arqyly teksergim kelip 15 danasyn satyp aldym. Ókinishke qaraı, biz onyń quramynda ne baryn bilmeımiz. Dárigerdiń aıtqanynan basqa, biz bilmeıtin 700-ge jýyq nárse bar. Bizde naryq baqylaýsyz», - deıdi halyq qalaýlysy.

Odan bólek, depýtat zań jobasyna túzetý engizý kezinde Úkimet búkil ekonomıkalyq faktorlardy zerttegenin aıtty.

Buǵan deıin Qazaqstanda veıpti ákelýge, óndirýge, satýǵa jáne taratýǵa tolyq tyıym salý josparlanyp otyrǵany habarlanǵan bolatyn.