Qazaqstanda neke jasy ulǵaıyp, azamattyq neke kóbeıip keledi
ASTANA. KAZINFORM – Áleýmettanýshy keıingi jyldary Qazaqstanda neke qııý kórsetkishi azaıyp, otbasyn qurý jasy ulǵaıyp kele jatqanyn aıtty.
– Sońǵy zertteýlerimiz boıynsha, orta eseppen áıelder 25 jastan keıin, al erler 28 jastan keıin nekege turady. Birinshi balany dúnıege ákelý jasy da artqan – qazirgi orta jas shamamen 29-da, – deıdi áleýmettanýshy Zarına Áskerbek.
Sarapshynyń pikirinshe, mundaı ózgeriske eń aldymen ekonomıkalyq faktorlar áser etedi. Jastar neke men ata-analyq jaýapkershilikti óz moınyna almas buryn turaqty tabys kózin tabýǵa jáne baspana máselesin sheshýge umtylady.
– Kóptegen respondentter aldymen qarjylaı táýelsiz bolýdy qalaıdy. Bul, bir jaǵynan, durys tendentsııa. Adam turaqtalǵannan keıin ǵana rýhanı jáne áleýmettik damýǵa kóbirek kóńil bóle alady, – dedi ol Jibek Joly telearnasyndaǵy «Bugin Live» baǵdarlamasynda.
Áleýmettanýshynyń sózinshe, qazir jastar arasynda azamattyq neke de jıileı túsken. Mamandardyń 2024 jyly júrgizilgen zertteý nátıjesinde, mundaı neke kóbine 30-44 jas aralyǵynda kezdesetini anyqtalǵan.
– Azamattyq nekede jaýapkershilik deńgeıi tómen bolady. Kóp jaǵdaıda bul zań aldyndaǵy jáne áleýmettik mindettemeden jaltarýǵa ákep soǵady. Degenmen Qazaqstanda dástúrli nekeniń basym úlesi saqtalyp otyr, – dedi ol.
Demografııalyq turǵydan alǵanda, mundaı jaǵdaı týý kórsetkishiniń tómendeýine jáne halyqtyń qartaıýyna ákelýi múmkin. Biraq Zarına Ákimbektiń aıtýynsha, Qazaqstanda bul protsess damyǵan eldermen salystyrǵanda baıaý júrip jatyr.
Aıta keteıik, elimizde neke buzý kezinde memlekettik baj mólsheri artatynyn habarlaǵan edik.